Itsarsuarnitsat Qassiarsummi nassaarineqarput
Itsarsuarnitsanik misissuisartut nunanit allaneersut tallimat, itsarsuarnisalerituunngorniarlu qallunaaq ataaseq, Qassiarsummi assaanerminni qallunaatsiaat illukuinik siornatigut nassaarineqarsimanngitsunik nassaarput.
Qassiarsummi assaanermut Nunatta Katersugaasivia akisussaasuuvoq.
Suleqaterput Judith Hard Peilmann sapaatip-akunnerani kingullermi assaasuniippoq.
Eriup Aappalaartup Qassiarsummi, Narsap Kommuniani, illukorisimasaata eqqaani assaaneq ingerlanneqarpoq. Islandimiut oqaluttuaataat naapertorlugit, ukioq 981-miunngikkuni 982-mi, Eriup Aappalaartup Islandimiit nunatsinnut nunasigami, qallunaatsiaqarfik, Brattalid, Qassiarsuk, tunngavilerpaa.
Caroline Paulsen, Danmarkimi Århusimi itsarsuarnisalerituunngorniartoq, Nunatta Katersugaasivianut attuumassuteqartoq, oqarpoq, Eriup Aappalaartup illorsuarisimasaata qarmaasa silataani attakuni assaallutik, iigaasimasut issunik aammalu ujaraannarnik qarmakkat nassaarisimagitik.
Caroline Paulsen oqarpoq, iikkatut ilusillit qarmakkat illukuni nassaatik qallunaatsiaanit kingusinnerusukkut qimanneqarsimasut, paasinarmat illorsuakuusimasut atorunnaarmatali attanik eqqaavigineqarsimasut, attakunik matuneqarsimammata. Iigaasimasup ilaa paasiniaavigalugu ulapinnerarput. Iigaq qarmagaq taanna sunaanersoq, illukorsuarmut allanullu qarmakkanut ullumikkut takuneqarsinnaasunut qanoq atassuteqarsimanersoq aammalu sapaatit akunneri kingulliit attakumut assataminnut qanoq atassuteqarsimanersoq paasiniarlugu. Maannakkut takuneqarsinnaalersimavoq qarmakkat nassaarineqarsimasut Eriup Aappalaartup illukorsuanut ilassutaasimasut.
-Qanoq pisoqarsimanera, aammalu nassaagut sooq siusinnerusukkut nassaarineqarsimannginnersut, nassuiaatissaqartinngilarput, itsarsuarnisalerituunngorniaq, Caroline Paulsen, oqarpoq.
Qassiarsummi assaanerminni suliatik Caroline Paulsenip naggataarutaasumik soraarummeerutissaminut atussavai.
Qassiarsummi assaanerit aqagu naammassissapput. Daniel Thorleifsen, Nunatta Katersugaasiviata pisortaa, nassaat pillugit oqaaseqarumanngikkallarpoq, nassaartut nalunaarusioqqaassammata.
