Itsarnisarsiuut Alaskami nassaarnerat siuaasatsinnit nutaanik paasisaqartoqarsinnaavoq

Alaskami qaqutigoortumik nassaartoqarneratigut siuaasatsinnut tunngassuteqartunik nutaanik immaqa paasisaqartoqarsinnaanngorpoq. Meeqqap toqungasup timaa ikuallagaasimasoq, ukiunik 11.500-nik pisoqassuseqarunartoq, ilisimatuunit illup iluani nassaarineqarpoq. Ilisimatuussutsikkut atuagassiami videnskab.dk-mi tamanna allaaserineqarpoq.

Meeraq ilisimatuut pingasunik ukioqarluni toqusimasoraat. Meeraq ikuallagaasimalluni illup iluani iliverneqarsimasoq nassaarineqarpoq, illulluuna qangarnisaanera ilisimatuunut paasissutissarpassuarnik oqaluttuartoq, illunimi taamanikkornisani itsarnitsanik nassaarnissaq ajornakusoortorujussuuvoq.

Itsarnisarsiuup, Aarhus Universitetimi adjunktip, Felix Riede-p, oqarnera naapertorlugu, taamanikkornisanik nassaartarneq qaqutigoortuuvoq:

- Ilisimatusarnitsinni ukiut kingumut amerliartuinnartillugit, taamanikkornisanik nassaarnissaq ajornakusoorsiartuinnartarpoq. Inuit taamanikkut ikittunnguupput, illut qajannaatsuunngillat, taamaammat itsarsuarnisat pinngortitamit piffissap ingerlanerani aserorneqartarput, Felix Riede oqarpoq.

Meeqqap timaa ikuallagaasimasoq Alaskami Upward Sun Riverimi nassaarineqarpoq. Illu assaanermi aamma nassaarineqartoq, USA-mi naalagaaffinni allani nassaarineqarsimasunut naleqqiullugu, Ruslandimi Ushkimi nassaarineqarsimasunut assingunerusoq ilisimatuut isumaqarput.

Ujaraannarnik sakkoqarallarnerup nalaani inuit, angutitamik piniariarnerini arnat meeqqallu illunik aasarsiortarfeqarsimasut:

- Nunat assaaffigisatta amerlanersaat piniariartarfiunerusimapput. Illulli uuma nassaarinerani paasivarput arnat meeqqallu aamma tamakkunani najugaqartarsimasut. Najugaqariaasiat qanoq ittuusimasoq eqqoriaqattaaginnartarsimavarput, maannali paasisaqarneruvugut, assaanermi peqataasoq, Ben Potter, oqarpoq.