Itsarnisarsiooq: Ukiut tusintillit najugaraat

Dansk Folkepartiip Kalaallit Nunaannut tunngasunik oqaaseqartartua Søren Espersen, naggueqatigiit Inuit Tunup avannaarsuani najugaqarsimanngisaannarnerarlugit oqarnera eqqunngitsoq, itsarnisarsiooq Nunatta Katersugaasiviani pisortap tullia Claus Andreasen oqarpoq.

- Ilumuunngilluinnarpoq, Kalaallit Nunaata avannarpiaani nassaatta takutippaat, naggueqatigiit Inuit nuna kristusip inunngornera ukiunik 2.400-nik sioqqulluguli najorsimagaat.

Kingorna aamma Akilinermit Kalaallit Nunaannut naggueqatigiit Inuit ingerlaartarsimanerat takussutissarpassuaqarpoq, Avannaani Tunumilu.

- Inoqartarsimanera sivikittarsimagaluartoq, Kalaallit Nunaanni tamarmi inoqartarsimanera takussutissaqarpoq, Claus Andreasen nassuiaavoq.

Søren Espersenip, Dansk Folkepartimeersup Danmarkip Tunup Avannaarsuanik piginnittuulernissaanut Siriusikkut qimussimik alapernaarsuisutut kisimik inussiaasarsimasunik oqarnera aamma eqqunngilluinnartoq, nunatta avannaarsuani inoqarfinnik ukiuni 20-ni kingullerni misissueqataasup oqaatigaa.

-Espersenip atuartuunermini oqaluttuarisaanermik atuakkami quppernerisa ilai qaangiinnarsimassavai. Tunup Avannaarsua ukiut 4.000-t sinneqartut matuma siornagulli inoqarsimanera ukiuni 50-ini kingullerni

nalunnginneqareerpoq, Claus Andreasen oqarpoq.

Tunup Avannaarsua kujammut Illoqqortoormiut tikillugit 1800-kkut qiteqqunnerat tikillugu inuit najorsimavaat, aatsaallu 1800-kkut naaneranni Europamiut ilisimasassarsiortut, piniariat allallu tikittalerpaat, nassuiaavoq.

- Aamma ilisimaneqarpoq danskit qimussimik alapernaarsuisitaat Sirius-ikkut sorsunnersuit aappaata nalaani aatsaat Tunup avannaarsua tikittaleraat. Aamma ilisimavara taamani kalaallinik ilaqartut. Claus Andreasen erseqqissaavoq.

Claus Andreasenip uggoraa, Kalaallit Nunaata avannaarsuata ukiuni tuusintilikkaani najorneqarsimanera arlalinnit ilisimaneqanngimmat.

Taamaammat paasisitsiniutiginissaa pingaartuussanerarpaa.

Tunup oqaluttuarisaanera pillugu Claus Andreasen, Katuami aqagu sisamanngornermi unnukkut arfineq-pingasut qeqqanut oqalugiassaaq.