ITK imminut toquttarnerup pinaveersaartinneqarnissaanik suliniuteqartoq
Canadami naggueqatigiit Inuit inuusuttaasa akornanni imminut toquttut ajoraluartumik amerlaqaat. Allaammi naggueqatigiit Inuit akornanni 20-t ataallugit ukiulinni toqusut amerlanerpaartaat imminut toqunnernit pisarput.
Inuit Tapiriit Kanatamip præsidentiata Natan Obedip naggueqatigiit Inuit sumiiffinni assigiinngitsuni maanna tikeraarpai, tamaani innuttaasut isumasioqatigissallugit.
Imminut toquttarnerup pinaveersaartinneqarnissaanut suliniutip siunertaata innuttaasunit paasineqarnissaa Natan Obedip sulissutiginiarpaa, pingaartumik inuusuttut akornanni.
Obedip Nunatsiavummi nunaqarfik Naini sapaatip-akunnerata massuma ingerlanerani tikeraarpaa, innuttaasut tassani isumasiorlugit.
Nainimi radio Okalakatiget Radio Obedip pulaarpaa, apersorneqarnerminilu ilaatigut oqaatigaa inuusuttut ulluinnarni inuunermi aporfiusinnaasut ilikkagaqarfigisariaqaraat, ajornartorsiuteqarunillu imminut toqunneq aqqutaanngitsoq aamma ilikkartariaqaraat oqaatigalugu.
Canadami naggueqatigiit Inuit akornanni imminut toquttarnerup pinaveersaartinnissaa pillugu suliniut National Inuit Suicide Prevention Strategymik taaguuteqartinneqarpoq, pilersaarullu ukioq manna juulip qaammataani saqqummiunneqarniarluni.