Itisuumi kilisanneq inerteqqutaalersinniarpaat
Itisuumi nunarsuaq tamakkerlugu kilisattarneq danskit naalakkersuisuisa ilanngullutik inerteqqutaatilissagaat, Folketingimi Atlantikup Avannaani Suleqatigiit ernummatigaat. Danmark qanoq isumaqarnersoq paasiniarlugu, Aalisarnermut Danmarkimi ministeri Høgni Hoydalip Savalimmiuniit saaffigisimavaa,
Avatangiisinut Folketingimi ataatsimiititaliap Greenpeace pingasunngormat ataatsimeeqatigaa – itisuumi kilisattarneq Naalagaaffiit Peqatigiit inerteqqutaalissagaat Greenpeacep anguniarpaa. Tamanna anguneqassappat Savalimmiuni aalisarnermut sunniutilerujussuussaaq – aamma ungasinnerusoq isigalugu, Kalaallit Nunaannut sunniuteqassalluni, Høgni Hoydal isumaqarpoq.
Taanna danskit politikererpaaluinut allagaqarsimavoq. Allakkamini ilaatigut ilisimatitsissutigalugu, itisuumi kilisattarneq pillugu Greenpeacep danskit polikeriinut saqqummiussimasaa, nalunaarusiaq kukkunerpassuaqartoq.
Danskit aalisarnermut ministeriat, Hans Christian Schmidt, Høgni Hoydalip ilutigalugu aperisimavaa, itisuumi kilisattarneq inerteqqutaalissagaluarpat Danmark qanoq iliussanersoq, taavalu Atlantikup Avannaani Suleqatigiit isummersuutaannut naalakkersuisut akuersaassanersut.
