Itigartitsigaluarneq atorsinnaajunnaarsippaa
Danmarkip Kalaallit Nunaatalu silaannartaanni CIA-p isertorluni timmisartuussisarsimanera pillugu tusagassiortup qallunaap allagaatinik takunnikkusunneranik nunanut allanut ministereqarfiup itigartitsinini eqqarsaatigeqqittariaqarpaa.
Danmarkip ombudsmandia, Hans Gammeltoft-Hansen, ippassaq taama aalajangiivoq.
Amerikamiut isertorlutik paasiniaasartut tigusanik assartuilluni Danmarkip Kalaallit Nunaatalu silaannartaatigoortitsisarsimasoq DR-ip piviusulersaarutaata 2008-mi oqaluttuaraa. CIA-p timmisartuutaasa Narsarsuarmi Kangerlussuarmilu mittarfiit miffigisarsimagaat tusagassiortup taamani takussutissaqartippaa.
Tusagassiortup qallunaap nunanut allanut ministereqarfiup USA-mi attaveqarfigisarsimasaa pillugu allagaatinik takunninnissaminik tamatuma kingorna qinnuteqaatigaa.
Nunanulli allanut politikkeqarneq pillugu paasissutissat taamaattut isertuunneqartariaqarnerarlugit nunanut allanut ministereqarfik itigartitsivoq.
Taamaaliorsinnaanngilarli, ombudsmandi aalajangiivoq.
Nunanummi allanut ministereqarfiup USA-mi attaveqartarnera pillugu Namminersornerullutik Oqartussat 2008-mi tusagassiuutitigut nalunaaruteqarput.
Isertugaataajunnaareersumik isertugaateqartoqarsinnaanngilaq, Hans Gammeltoft-Hansen oqarpoq allagaatinillu takunnikkusulluni qinnuteqaat nunanut allanut ministereqarfiup isummerfigeqqittariaqaraa piumasaralugu.