Italiamut Italiamiillu 3 junimit aallartoqarsinnaalissaaq

Italiamut Italiamiillu juunip ulluisa pingajuannit angalasinnaalernissamut peqqussummik Italiami naalakkersuisut ullaassaq akuersipput.

Italiami killilersuinerit sukannerpallaarunnaarnissaanik suliniutinut tamanna ilaavoq, killilersuinerit marsimi atuutilersinneqarput coronavirusip siaruaatinnginnissaa pillugu.

Italiami nunap immikkoortuisa akornanni angalasinnaaneq juunip ulluisa pingajuanni aamma periarfissanngussaaq, taakkua akornanni angalaqqilersinnaanissaq ilungersuutigineqarsimavoq.

Italiami ministeriunerup Giuseppe Contep Italiami killilersuinerit arriitsumik ammaqqikkiartuaarnissaat aalajangiusimavaa, coronavirusip aappassaanik siaruaannissaa pinaveersaartinniarlugu.

Pisiniarfiit neriniartarfiillu ataasinngorpat ammassapput

Pisiniarfiit nerinartarfiillu ataasinngorpat ammassapput

Ammaqqikkiartuaarnerani, pisiniarfiit ataasinngornermi ammarneqassapput, kiisalu Italiami nunap immikkoortuinut allanut tikeraartoqarsinnaalissaaq.

Neriniartarfiit Italiami tamarmi ammaqqinnissaminnut piareersarput, taamaattorli inuit qanillivallaannginnissaannut eqqiluisaarnissamullu malittarisassat sukannersuullutik.

Italiami manna tikillugu nunarsuarmi tamarmi coronaviruseqartoqarnerani toqusut amerlanersaapput, tassami inuit 31.000-it coronaviruseqarlutik toqugamik 220.000-nillu amerlanerusut tunillatsissimallutik.