Rwandamit sakkutuutut pissusilersortut FDLR-ikkut, Congop nunamut namminermut ministereqarfiata ataasinngornermi paasissutissiinera naapertorlugu, saassussinermut akisussaasuupput.Assi: Alexis Huguet/AFP/Ritzau Scanpix

Italiap ambassadøria saassussinermi toqutaasoq

Inuit pingasut Den Demokratiske Republik Congop kangisissortaani saassussinermi toqutaapput.

Italiap Den Demokratiske Republik Congomut ambassadøria, nunap kangisissortaani saassussisoqarmat toqutaavoq.

Italiami nunanut allanut ministereqarfik ataasinngornermi taama paasissutissiivoq.

Ambassadørip Luca Attanasiop ikiligaanini toqqutigigai, atorfilittani pingaarnerit ilaat atiminik isertuussisoq nutaarsiassaqartitsivimmut AFP-mut oqarpoq.

Inuit allat marluk saassussinermi toqutaapput. Taakkunannga ataaseq Italiap sakkutuuisa politiivineersuuvoq. Inuit pingasut aallarunneqarsimasutut aamma nalunaarutigineqarput.

43-nik ukiulik, Luca Attanasio, diplomatitut atorfeqarpoq. Taassuma nuliani meeqqanilu pingasut qimatarai.

Sakkutuutut pissusilersortut saassussisimasutut pasisaasut

Rwandamit sakkutuutut pissusilersortut FDLR-ikkut, Congop nunamut namminermut ministereqarfiata ataasinngornermi paasissutissiinera naapertorlugu, saassussinermut akisussaasuupput.

Rwandap naalagaaffiata sakkutoorisimasaasa allanik ilalerlutik FDLR Congop kippasissortaani 2000-mi pilersippaat. Taakku Rwandami inunnik 800.000-it missaanniittunik ukiut arfinillit matuma siorna toqoraapput.

Taakkuli sakkutuutut pissusilersortut Congop kangisissortaani siooranartunik ersiortitsinernillu taamani siammarterinikuupput, ilaatigut toqutsisimasutut, kinguaassiuutitigut pinngitsaaliisimasutut innarliisimasutullu inuttaasunit oqaatigineqartarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat