Italiamiut kalaallit meerartaannut ikiuunniarput

Italiamiut qallunaallu ikinngutigiinnerannut peqatigiiffik Københavnimiittoq, kalaallit meerartaannut ikiuiniarluni ullumi aningaasannannialeruttorpoq.
decembarip 05-at 2009 12:38

Peqatigiiffiup siulittaasuata, Italiamiup Gino Roccap oqaatigaa, Italiamiorpassuaqartoq Danmarkimi najugalinnik, Nunatsinnut ikiuerusuttunik.

- Taamaattumik kalaallit meerartaannik ikiuinissamik siunertaqarluta, julefrokosterniarpugut, ilaatigut tamatumuunakkut nuna, uagut Europami kujasissormiut ilisimasaqarfigivallaanngisarput paasisaqarfigineruniassagatsigu, taama oqarpoq Gino Rocca, ukiuni qulini Danmarkimi najugaqarsimasoq.

Ullumikkut pisussanut ilanngullugu Dorrit Hermann suliniaqatigiiffimmit Red Barnetimeersoq oqalugiassaaq, Nunatsinni meeqqat atugarliortut pillugit oqaluttuartussaasoq, kiisalu Italiamiut kalaallillu nipilersortartui nipilersortussaapput.

Peqatigiiffiup Serate Italianesip Italiap naalagaaffeqatigiillu akornanni paaseqatigiinnerunissaq siunertaraa.