Italiamiorpassuit Nuummi ullumi takussaapput
- Italiamiut umiarsuaatileqatigiiffiutaat Costa ukiut tulleriissiinnarlugit Kalaallit Nunaanniippoq. Umiarsuaq alla Luminosa iluatsilluartumik siorna Kalaallit Nunaaneeqatigaa, Nunatsinni Takornariaqarnermi
Inuussutissarsiornermilu Siunnersuisoqatigiinni siunnersortaaneq, Malik Milfeldt, oqarpoq.
Deliziosa umiarsuuvoq kusanartorsuaq inuulluataarnartorlu, 1.100-t sinnerlugit initaqarpoq, silami naluttarfiit marluupput, iluanilu ataatsimik aamma naluttarfeqarluni, ataatsimik aningaasanoortarfeqarpoq, nutaaliaalluinnartumik filmertarfeqarluni, arlalissuarnik imerniartarfeqarpoq, neriniartarfeqarluni caféqarlunilu, taakkunanilu italiamiut nerisassaativiinik sassaalliisarput, iluatannartorujussuuppullu, Malik Milfeldt unnersiorpoq.
Takornariat Italiameersuunerupput, taakkualu kiffartuulluarusullugit takornariartitseqatigiiffik Nuuk Tourism 30-nik immikkut sulisussarsivoq, aamma illoqarfimmi imaanilu angallassisussanik. Takornariartaassuarmi inuttanit 1.000-iusunit amerlaqisut Nuummi aamma takornarniarput, Nuuk Tourismimi pisortaq, Jon Krog, oqaluttuarpoq.
- Immikkut sulisitatta 30-t takornariarpassuit sullippaat. 300-t angallatinik angalaarput, sulilu amerlanernik angallatissaqarsimagaluarutta marloriaataat immaqa angallassimassagaluarpavut, Jon Krog oqarpoq.
Takornariartaassuaq arferngup missaani avannamut aallarpoq, Ilulissiarluni.
Takornariat taama amerlatigisut ilaasoralugit imaannaanngilaq, taamaammat Deliziosa ullut marluk Ilulissat avataaniissaaq, tassa marlunngorpat pingasunngorpallu, takornariat sapinngisamik amerlasuut angalaalaarnissaminnut periarfissaqarniassammata.
Costa Deliziosa takornariartaassuit Ilulissanut ukioq-manna tikittussat anginersaraat, sulili anginermik Nuummut tikittoqartussaavoq, tassa Crown Princess, 3.100-t sinnerlugit ilaasoqarsinnaasoq, septembarimi tikissammat, taannalu aamma Nanortalimmukassaaq.
