Italiami mafianut akiuiniarnermi unnerluussisussaatitaasuni tusaamasaanerpaaq politiinillu ukiunit 30-nit ikinnerunngitsuni illersugaasoq 62-inik ukiulik, Nicola Gratteri, unnerluussisuuvoq.Assi: Alberto Pizzoli/AFP/Ritzau Scanpix

Italiami mafiani pissaaneqarnerpaat pillugit eqqartuussivinni suliarujussuaq aallartittoq

Italiami mafianeersunik eqqartuussisoqarnissaa ukiuni suliassat annersaasa ilaat ullumi pingasunngornermi aallartippoq.

Mafiat ilaat 'Ndranghetamik taaguuteqartut eqqartuussivimmut sassartinneqassapput, inuillu sassartinneqartussat katillutik 355-iupput. Nutaarsiassaqartitsivik AFP taama allappoq.

Politikerit, atorfilittat suliffeqarfiutillillu unnerluutigineqartunut ilaapput.

Amerlanerit politiit aaqqissuussaasumik sulinerisigut Italiami nunanilu allani 2019-imi tigusarineqarput.

Toqutsisimasutut, toqutseriarsimasutut, pinngitsaaliilluni akiliisitsiniarsimasutut, ikaroornartunik eqqusseriarsimasutut, atorfimmik atornerluisimasutut pinerlunniaqatigiinnilu ilaasortatut pasilliisoqarluni tigusarinnittoqarpoq.

Eqqartuussineq ukiunik marlunnik sivisussuseqassangatinneqarpoq.

Ilisimannittut nassuiaateqartussat akornanni 58-it immikkut maluginiarneqarnissaat ilimagineqarpoq.

Taakkumi mafiani 'Ndranghetameersuupput, 'Ndranghetalu pillugu nipangiussisimanissamik neriorsuutertik avaqqullugu nassuiaateqarnissaat ilimagineqarmat.

Ilaqutariit hunnorujulikkuutaat 'Ndranghetami ilaasortaapput, pinerlunniaqatigiittut ilaatigut suleqatigiillutik.

Unnerluutigineqartut amerlanerpaartaat ilaqutariit Mancusokkunneersuusut

Italiami qeqertami Siciliami mafiat La Cosa Nostrameersut, Palermomut atassuteqartut, Napolimilu Camorramut sanilliullugu 'Ndranghetameersut Italiap kujasissuani Calabriami nunaannarmi najugaqarfinnut atassuteqarput.

Inuillu unnerluutigineqartut 355-it akornanni amerlanerit ilaqutariinnut ataatsineersuupput, ilaqutariit Mancusokkunneersuullutik.

Italiami mafianut akiuiniarnermi unnerluussisussaatitaasuni tusaamasaanerpaaq politiinillu ukiunit 30-nit ikinnerunngitsuni illersugaasoq 62-inik ukiulik, Nicola Gratteri, unnerluussisuuvoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat