Italiami katissimanngitsut katissimasutullu pisinnaatitaaffeqalissagunarput

Allattoq Jaaku Lyberth
marsip 30-at 2007 17:03

Italiami katissimanngikkaluarlutik inooqatigiit periarfissarsissunneqangajalerput arlartik toqukkut qimagutsillugu pigisaanik kingornussisinnaallutik tamatumalu saniatigut aappariittut allatulli katissimasutut naatsorsuussaallutik pisortanit ikiorsiissutinik aamma ikiorserneqarsinnaanerat aqqutissiuunneqarluni. Inatsisissatut siunnersuut Italiami naalakkersuisut katissimanngikkaluarlutik aappariinnut iluaqutaasussaq saqqummiunnissaanut piareereepaat. Italiamilu innutaasunit amerlanerussuteqartunit siunnersuut tapersersorneqartoq oqaatigineqarpoq. Italiamiulli biskopiisa maannakkut oqaatsigaat, politikerit katuuliusut pisussaafeqartut siunnersuut taasissutigineqalerpat akerliliisussaallutik.

Biskopillu taamatut inassuteqaateqarsimanerat Italiami naalaaffimmut ministeriusup kamaatigisorujussuuaa.

Biskopillu pisuutippai Romano Prodi-p naalakkersuisooqatigiivinut qiterlerpaatut inissisimaniartunut kiisalu saamerliunianut nukillaarsaaniartuunerarlugit. Partiimmi taakku politikikkut suliniarnerminni katissimanatik aappariit ajunnginnerusumik pisinnaatitaaffeqalernissaannik qulakkeerinninnissamik suliniuteqarput, suliniutaannilu pineqartut tassaapput; kikkulluunniit aapparittut inooqatigiit katikkusussimanngitsut kiisalu anguteqatiminnik inooqateqartut arnaqatiminnillu inooqateqartut Italiami katissinnaatitaanngitsut atugarissaarnerulissasut.

Pisortatigoortumik biskopit allagaqarnerminni inassuteqaatigisimavaat Italiami anguteqatiminnik arnaqatiminnilluunniit inooqateqartut inatsisitigut qanorluunniit pitsaanerusumik atugaqartinneqarnissaannik taasisoqarniartillugu Italiami katuullit politikkeriisa kikkulluunniit tamanna taasinermikkut akerlilersortassagaat.

Naalaffimmi pissutsinut ministeriusoq Guyano Amato oqarpoq; biskopit Italiami inuit susassareqatigiittutut inuunerannut tamanna ulorianaateqarnerarlugu oqalunnerat kusanaatsuusoq. Taamatut uparuartuinerit islamisiortut pissusilersornerannut eqqaanartutut isigaarput, taama oqarpoq ; Amato.

Inatsisissalli taasissutigineqarnissaanut Prodi-p naalakkersuisooqatigiivinut ajornartorsiortsitsisussaq tassaavoq, naalakkersuisooqatigiit ataatsimik amerlanerussuteqalaarnerat, inatsisissarmi akuerineqassappat naalakkersuisooqatigiit tamarmik inatsisissamut taasisussaapput. ilaqarpummi oqaluffimmut attuumassutilerujussuarnik tassa katuuliusunik. Naggaterpiaatigullu inatsisassaq taasissutigineqalerpat Prodi-p naalakkersuisooqatigiivinut isasoortitsinermik kinguneqariaannaavoq.