Italiami eqqartuusiviit qullersaat eqqartuussummik aalajangiivoq
Eqqartuussut SAS-ip timmisartuutaanut Milanomi timmisartoqarfimmi Linate-mi nakkartumut, inuillu 118-it ajunaarnerannut, tunngassuteqarpoq.
Ajunaarneq 2001-imi oktobarimi pivoq, SAS-ip timmisartuutaa ilaasartaat Københavniliassalluni timmisartut allartarfianni timmisartumut Cessnamut apormat. Cessna, inuinnarnit pigineqartoq, kukkuluttornikkut SAS-ip timmisartuutaata qangattarfissaanut pisimavoq.
Ajunaartut ilaqutaasa timmisartup ingerlaarnerannik nakkutilliisunut tallimanut eqqartuussutip inernera naammagisimaarpaat, timmisartoqarfimmili pisortat marluk pinngitsuutinneqarnerat naammaginagu.
-Taamani pisoq pimmat kangunaqaaq, sulilu taamaappoq, Linatemi ajunaarnermi ajunaartut ilaqutaasa katuffianni siulittaasoq, Paolo Pettinaroli oqarpoq.
Milanomi ajunaarneq SAS-ip oqaluttuarisaanerani ajornerpaavoq. Danskit 16-it ajunaarput, Cessnami timmisartortartut marluk issimasullu marluk aamma ajunaarlutik. SAS-ip timmisartuutaa timmisartoqarfiup iluanut sisoormat timmisartoqarfimmi Linatemi nassatanik tunniussisarfimmi sulisut sisamat aamma ajunaarput.