Italiami coronavirusimik toqquteqartut amerliariapiloortut

Italiami coronavirusimik toqquteqartut ullut pingasut ingerlaneriinnaanni 107-iniit 148-nngorsimasut, Italiami upalungaarsimanermik suliallit ilisimatitsissutigaat.

Taamatuttaaq pingasunngornermi tunillatsissimasut 3089-iniit sisamanngornermi 3858-nngorsimasut nalunaarutigineqarpoq.

Taamaalilluni Italiami coronavirusimik tunillatsissimasut Europami amerlanerpaapput.

AAMMA ATUARUK Over 100.000 mennesker er blevet smittet med coronavirus

Italiap avannaani sumiiffinni arlaqartuni coronaviruseqalersimasut siulliit ullut 14-it matuma siorna nalunaarutigineqarput.

Naak tunillatsissimasut amerliagaluartut inuit 414-it peqqissigallartutut maannamut nalilerneqarsimapput.

AAMMA ATUARUK Italiami atuarfiit ilisimatusarfiillu matugallarneqartussanngortut

Italiamilu coronavirusip kingumut siaruaassimanera pillugu ministeriunerup, Giuseppe Contep, atuarfiit universitetillu tamakkerlugit marsip ulluisa 15-iata tungaanut matoqqasussanngortippai.

Coronavirusip ersiutigisartai ilaatigut tassaapput, kiaqarneq, qasoqqaneq quersorulunnerlu.

Naalagaaffiit Peqatigiit peqqissutsimut suleqatigiiffiata tamanna nalunaarutigaa.