IT-mik suliffeqarfik Fynimeersoq Nunatsinni immikkoortortaqarfiliulersoq
Suliffeqarfik Nuummi immikkoortortaarniarpoq, ilaatigullu kalaallinik it-mik ilinniartunut periarfissiiniarluni.
IT-mik suliffeqarfik EG Fynimeersuuvoq, taassuma maanna Namminersorlutik Oqartussat kommunillu aningaasanik aqutsinerminnut atugaat misissuleruttorpai.
EG-mi pisortaaneq Leif Vestergaard KNR-imut taama oqarpoq.
- Suliassarput tassaavoq Namminersorlutik Oqartussani aningaasaqarnikkut aqutsinermi teknologiip iluani nutaaliornissaq.
Suliffeqarfik systemip aqunneqarnissaa pillugu aasaru Namminersorlutik Oqartussanut isumaqatigiissusiortussaavoq.
Nunatsinni immikkoortortaqarfiliorniarpoq
EG ullumikkut Nukissiorfinni it-mik aqutsinermik suliaqareerpoq. Suliffeqarfiullu naatsorsuutaatut ingerlasoqassappat, Nunatsinni immikkoortuliorniarpoq tamaanimiunik sulisulerluni.
- Pissarsiarisinnaasagut misissussuagut. Nunaqavissunik sulisortaarusoqaagut. Aamma qallunaanik Kalaallit Nunaanni atorfinitsitserusoqaagut. Kisianni uatsinnut pingaarnerpaavoq pisariaqartitatsinnik piginnaaneqarnissaat. Tassunga atatillugu aamma pissarsisinnaanngikkutta nammineq piginnaaneqarnernik pilersitseqataarusuppugut.
Eqqarsaatigaarpummi kalaallit danskit ilisimatusarfiini it-mik ilinniartut suliffeqarfitsinni ilinniartorisalerniarlugit.
- Taamaattumik aamma misissorparput, ilinniartut ilaat qanoq ililluta pilersaarutitsinnut piginnaaneqarnerulersissinnaanerlugit, uatsinni sulilernissaat siunertaralugu, pisortaaneq Leif Vestergaard oqarpoq.
Kalaallit Nunaanni immikkoortortassap angissusissaanut isumaqatigiissutissap qanoq ittuunissaa apeqqutaajumaartoq, suliffeqarfik KNR-imut oqaluttuarpoq.