IT-mik ineriartortitsinissarsuaq isumalluarfigineqarpoq

Niuernermik Ilinniarfimmi IT pillugu ilinniagaqartut ilaat attaveqaateqarnerup eqaalinissaanik takorluugaqarpoq

- Inuiaqatigiit immap naqqatigut kabeleqalernissaq iluaqutigissavaat,

John Morgensen Katuami ataatsimeersuarnermi peqataasoq oqarpoq.

Internettip sukkatsinnissaanut atatillugu immap naqqatigut kabeli ullumikkornit sukkatsinnerujussuanngussasoq, ataatsimeersuarnermi saqqummiunneqarpoq.

Taassuma ilanngullugu siunissami periarfissat atorneqalersussat ilaat ima oqaatigaa

- 3D Printeri saviminernik printerisinnaasoq mekanikerit nunanut allanut reservemik inniminneeqqaanngikkaluarlutik namminneq programmi ikiortigalugu atortussaminnik anillatsitsiinnarsinnaalissapput, IT-mik ilinniagaqartoq John Morgensen oqarpoq.

Ataatsimeersuarnermissaaq teknologiimut tunngasunik saqqummersitsisut utoqqarmit soqutigineqarput.

- Tupinnaqaaq. Pisuttuarlunga anigama inoqarpallaaqimmat aqqusaalaarama. Sunannguaq toorunikku tassa tupinnaq, Dorthea Olsen oqarpoq.

Saqqummersitat Katuami aqagu aamma takuniarneqarsinnaassapput.