IT Factoryp pisortaa peqquserluttuliorsimasorineqarpoq
Danskit qarasaasialerinermik suliffeqarfiat IT Factory ullumi akiilisinnaajunnaariasaarpoq, suliffeqarfiup pisortaanit 500 millioner koruuninik peqquserluffigineqarsimagunarluni.
Oqaluttuaq pinerluttunik atuakkiatut nipeqarpoq:
decembarip 01-at 2008 17:21
Suliffeqarfiup pisortaa Stein Bagger Dubai-imi nulianilu sisamanngormat feeriartillutik nulia eqqumiiginnilerluni uini politiinut tammaanerarlugu nalunaarutigaa.
Suliffeqarfiup siulersuisui piginnittuilu sapaatip akunnerata naanerani suliamik misissuinerminni suliffeqarfiup pisortaa immikkut sumiiffimmi allami allaffeqarsimasoq paasivaa, 500 milliuuni koruuninillu peqquserluuteqarsimanissaa ilimagilerlugu.
IT-mik suliffeqarfissuaq ingerlalluaraluarpoq, nersornaaserneqarsimalluni, Bjarne Riisillu cykkelertartuinut aningaasaliisuulluni.
Suliffeqarfissuup pisortaa Stein Bagger, suliffeqarfiup piginnittaanik Asger Jensbymik atsiortitsisuusaartarsimanermigut taama peqquserluttuliorsinnaasimavoq.
