IT-79: Tamaviaassaagut

B-67-ikkut ukiut kingulliit sisamat pissartaasarput. Ukiorlu manna isikkamik arsaalluni pissartanngorniuunnissami ilimanaatillit arlaqarput.
Allattoq Mads Pedersen
aggustip 02-at 2016 14:25

Oqaluttuarisaanermi siullerpaamik isikkamik arsaalluni pissartanngorniunnerit ivigaasani pissapput. Qularnanngitsumillu tamanna piumassusermik immikkut ittumik peqataasuni pilersitsisimassaaq. 

Ukioq manna pissartanngorniuunnermi IT-79, Nuummeersut, aaqqissuisuupput. Taakkulu pissartanngortussatut ilimanaatillit ilagaat. Pissartanngorusullutillumi tamaviaassasut, sungiusaasuat neriorsuivoq. 

- Pitsaanerpaamik angusaqarusuppugut. Pissartanngorniuunnermi holdit pitsaanerpaat peqataasussaapput, tamarmillu pissartanngorusullutik. Taamaammat unamminerit ajornanngitsuunavianngillat.

- Soorunami pissartanngorusukkatta tamaviaassaagut, IT-79-imi sungiusaasoq, Allan Geisler, KNR-imut oqarpoq. 

B-67-imi ukiorpassuarni unammisartuullunilu pissartaasartoq, Malik Juhl, ukioq manna IT-79-mi unammeqataassaaq, tamannalu IT-79-ikkut pissartanngornissamut ilimanaateqarnerat minnerulersinngilaa. 

IT-79-ikkut pissartanngorniuunnermi arsartussatik suli toqqanngilaat. Qularnanngitsumilli iligiit aqutsisuat Kaassannguaq Zeeb, qeqqani kinguarsimakannerluni siuarsimakannerlunilu unammisinnaasoq, unammeqataasussatut toqqagaassaaq. 

Taamatuttaaq Hans-Karl Berthelsen, Malik Juhl kiisalu Kuluk M. Ezekiassen, tamarmik siukkaallutillu qeqqaniiittuusinnaasut, qularnanngitsumik pissartanngorniuteqataasussatut toqqagaassapput. Tamaanngippat tupaallannartumik pisoqarsimassaaq. 

Qulaani taaneqartut arsassappata IT-79-ikkut saassusserusussuseqarlutik arsassasut qularnanngilaq. 

Pissartat kaattut

B-67-ikkut, ukiut kingulliit sisamat pissartaasut, ukioq manna pissartanngoqqinnissaat ilimanaatilerujussuuvoq. Ukioq manna futsalimi tupaallannaqisumik angusarlupput, taamaammallu pissartanngorniuunnermi pisussami tamaviaassasut qularineqassanngilaq. 

B-67-ikkut sukataarlutik sungiusaleruttortut pissartanngoqqinnissaminnullu kaattut klubbimut attuumassutilik KNR-imut ilisimatitsivoq. 

Aamma atuaruk Angutit siullermeerlutik ivigaasani pissartanngorniutissasut

Unammisartut sungiusarneqanngitsut

G-44 Qeqertarsuarmeersut, ukioq kingulleq bronzinnattut,  ukioq manna illoqarfimminni arsaaffimmi sungiusarnikuunngillat. Tassami aputaarutiinnaavissoq arsaattarfiat ivigaasalerniarlugu suliarineqalerpoq sulilu naammassineqarani. 

Qeqertarsuup arsaattarfiata saniani nunami manittumi ujaratarasaarlunilu sioratarasaartumi sungiusartariaqarsimapput.

Tamannali ajornartorsiutaasimagunanngilaq. Tassami anngunniunnerni ataasiarlutik naligiinnerat eqqaassanngikkaanni ajugaaginnavipput. 

Taakku ullugissaartillutik kikkulluunniit ajugaaffigisinnaavaat, taamaammat finaleratarsinnaanerat tupaallannartuunavianngilaq. 

- Soorunami angusarissaarusulluta unammissaagut, iligiinni aqutsisoq Nukannguaq Zeeb KNR-imut oqarpoq. 

Pissartanngorniuunnerit KNR-TV-kkut sapaatiuppat aggustip ulluisa 7-ianit 15-iat ilanngullugu aallakaatinneqartassapput. 

Klubbit pissartanngorniuteqataasussat ukuupput:

Unammeqattaartussat A:

IT-79, Nuuk
TM-62, Kulusuk
FC Malamuk, Uummannaq
Nagdlunguak, Ilulissat

Unammeqattaartussat B:

G-44, Qeqertarsuaq
B-67, Nuuk
Siuteroq, Nanortalik
Kâgssagssuk, Maniitsoq