Assi: KNR

Atuakkiornermik piginnaanilik Isummat pigiliutiinnakkat pinnagit immitsinnut assuariunnaartariaqarpugut

Atuagaq nutaaq kalaallinit atuakkioqqaanit allanneqartunik imalik sapaammi saqqummersinneqarpoq. Atuakkiortut quliusut ukioq manna Allattap oqaluttuaraaliornermik unammisitsinerani ajugaasuupput. Tamatumuunalu inissaqartitsineq sammineqarluni.

- Tunumiorsuinngooq toqutsigajorsuupput, Upernavimmiunngooq kinguteqanngitsorsuupput, Qaanaarmiunngooq tamarmik imerajupput, Nuummiunngooq qallunaatuinnaq oqalupput, illoqarfimmioqatiginngisammigooq tatigisassaanngillat, ajugaasut ilaat Tukumminnguaq Nykjær Olsen issuaalluni taama ilaatigut saqqummiussaqarpoq. 

Ajugaasut tamarmik inissaqartitsineq pillugu taalliornikkut, oqaluttuaaraliornikkut allataaqqatigullu isummersorsimapput. 
Inissaqartitsineq isummanut pigiliutiinnakkanut katakkuminaatsunut ilaatigut tunngasoq, Tukumminnguaq Nykjær Olsenip oqaatigaa. 

- Meeraallunga tusartakkakka - meeraallunga upperisakka illit suli upperaatit, sumiuunerlunga oqarusunngittarnikka kanngusuutigeqqinngisaannassavakka, kanngugeqqinngisaannassavara oqassallunga Qaanaami peroriartorlunga, Allattami allaaserinneqataasoq issuaalluni taama saqqummiussaqarpoq.
Naliginnissaq inissaqartariaqartoq

Inuiaqatigiinni naligiimmik inissaqarnissaq immikkoortitsinnginnissarlu, Tukumminnguaq Nykjær Olsenip oqariartuutigaa. 

- Illit una kanngusuttussaasutit peqataatitserusunnginnavit - inissaqartitserusunnginnavit, Kalaallit Nunaanni nunarsuarmi qeqertat annersaanni, 
Tukumminnguaq Nykjær Olsenip allassimasani " Piumassuserinngisaminnik tappiitsut"-mik atsersimasani taama naggaserpaa. 

Atuakkiortoq Ilimmarfimmi inuiaqatigiilerineq pillugu ilinniartuuvoq. Ilisimatusarneq qimalaarlugu unammisitsineq atorluarsimallugu oqaatigaa:

- Akademiskiunngitsumik allannissara misilikkusussimavara, inuiaqatigiit tikillugit allannissara kissaatigisimavara, apuussassaqartutut misigisimagama, ajugaasut ilaat, Tukumminnguaq Nykjær Olsen oqarpoq. 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl