Sara Olsvig: Isummat assigiinnginnerat tuaviuussamik inatsisiliornermi peqqutaavoq

Ukiaanerani ataatsimiinnermi inatsisit tuaviuussamik suliarineqarnerat pillugu kattuffiup Transparency International Greenlandip Inatsisartunullu ilaasortat ilaasa isornartorsiuinerat Naalakkersuisut Siulittaasuannut tullersortip Sara Olsvigip paasisinnaallugu, KNR-imut oqaatigaa.
Sara Olsvig Inuit Ataqatigiit
 - Ingammik aalisarnermut inatsit eqqarsaatigalugu tamanna isumaqataaffigaara aamma nuannaarutigaara Naalakkersuisoq Hans Emoksen tassani aamma taamatut oqariartuuteqarmat. Taamaammallu naatsorsuutigilluinnarpara Naalakkersuisuni suleqatgiinnitsinni tamanna massakkut eqqumaffigineqarnerussasoq. Assi © : KNR / Paarnaq Hansen
novembarip 30-at 2017 15:50

- Anersaartorluarluta immitsinnut qiviartariaqartugut oqarluta, suut mianerisassaraagut suut ilisimalluinnarlutigit massakkut alloriaqqissaagut, tamannalu aamma Naalakkersuisut sulineranni qulakkeertariaqarparput ukiuni tulliuttuni, Sara Olsvig taama oqarpoq. 

Aalisarneq mittarfeqarfiillu pillugit inatsisissat tuaviuussamik suliarineqarsimanerarlugit oqalunnneq, Olsvigip paasilluarsinnaavaa. 

AAMMA ATUARUK Inatsisartut tuaviuussamik suliat itigartitsissutigisinnaavaat

Inatsisartunut ilasortat ilaat Transparency International Greenlandilu tamatuminnga isornartorsiuipput.

Naak Naalakkersuisooqataasutut inatsisiliornermi tuaviuussinermut akisussaaqataagaluarluni, aalajangigassat pingaarutillit suliaritillugit politikerit peqqissaartumik suleriaaseqartariaqartut, Olsvigip erseqqissarpaa. 

 - Pisariaqarpoq inatsisit inuiaqatigiinnut annertuumik sunniuteqartussat aammalu annertuunik sanaartugassanik imaluunniit inuussutissarsiornikkut sunniuteqarujussuartussaasunik inatsisiliortoqartillugu peqqissaartumik piffissaqarfigilluarlugulu suliarineqartarnissaat, Naalakkersuisoq oqarpoq.

Isummat assigiinngittarnerat peqqutaasoq

Naalakkersuisooqatigiit Naalakkersuisullu iluminni isumaasa assigiinngittarnerat, inatsisiliornermi tuaviuussisarnermut peqqutaasoq  Sara Olsvig oqarpoq:

 - Naalakkersuisooqatigiinni Naalakkersuisunilu inuppassuuvugut, tassanilu aamma isummat assigiinngitsut saqqummertarput.

AAMMA ATUARUK Tuaviuussamik inatsisinik suliaqartarneq ernummatigineqartoq

Inatsisissat amerlanersaat najoqqutassat malillugit suliarineqartut, Olsvigip erseqqissarpaa. 

Naalakkersuisut Inatsisartullu siunnersuutinik suliarinninnissamut, partiit iluminni oqaloqatigiinnissaannut minneerungitsumillu inuiaqatigiinni susassalinnik oqaloqateqarnissamut piffissaqarnerusariaqaraluartut, Naalakkersuisut siulittaasuannut tullersortit aappaata Hans Enoksenip KNR-imut oqaatigaa. Aammalumi aalisarneq pillugu initsisissamik suliaqarnermi taamaannginneraasoqarpoq. 

Sara olsvig tamatumunnga isumaqataavoq: 

 - Ingammik aalisarnermut inatsit eqqarsaatigalugu tamanna isumaqataaffigaara aamma nuannaarutigaara Naalakkersuisoq Hans Emoksen tassani aamma taamatut oqariartuuteqarmat. Taamaammallu naatsorsuutigilluinnarpara Naalakkersuisuni suleqatgiinnitsinni tamanna massakkut eqqumaffigineqarnerussasoq.