Isumassarsiaq piniartunit tapersersorneqarpoq
Illoqqortoormiuni Aalisartut Piniartullu peqatigiiffianni ilaasortat amerlanerussuteqartut isumassarsiamut tapersersuisut, siulittaasoq Marius Madsen oqarpoq.
Nannut Illoqqortoormiunut qanillattortut qamuteralannik imaluunniit umiatsiaaqqanik malersorlugit seqqortaarfigalugillu qaammatip kingulliup ingerlanerani qimaatinniarneqartarput.
Nannuttassiissutit tuniniarneqarnerisigut aningaasarsiorsinnaaneq piniartunit isumaqatigineqarluinnarpoq. Nannuttassiissutip ataatsip umiarsuarnut takornarianik angallassisartunut tunineqarnera 35.000 koruuninik akeqartussatut suliniuteqartup Morten Hilmerip takorloorpaa.
Nannup amia ataaseq 15.000 koruunilerlugu ullumikkut tunineqartarpoq.
Isumassarsiaq Inatsisartut aalisarnermut piniarnermut nunalerinermullu ataatsimiititaliaannit iluarineqarpoq.
- Piniartut nannuttaassiissutinik takornarianut kattuffissuarnullu tunisisalernissaannik isuma soqutiginarpoq, Juliane Henningsen Inatsisartut piniarnermut ataatsimiititaliami ilaasortaq oqarpoq. - Pingaartinneqarnerpaassaaq isumassarsiaq piniartunit qanoq isumaqarfigineqarnersoq, aammalu nannunik piniarnerup unitsinneqannginnissaa pingaaruteqartoq, Juliane Henningsen oqarpoq.
Piniartut nannuttassiissutitik kattuffinnut, soorlu uumasunut illersuiniaqatigiiffimmut Greenpeacemut, tunisinnaanissaat Morten Hilmerip siunnersuutigaa. Tamannalu isuma - ileqqorissaarnissaq eqqarsaatigalugu - Juliane Henningsenimit orniginartinneqanngilaq. Nannutassiissutit kikkunnut tunineqartassanersut eqqarsartoqaqqissaartariartoq, isumaqarami.
- Greenpeace allallu uumasunik illersuiniat nannunniarnermut akerliusut nannutassiissutinik tamakkiisumik pisissappata tamanna uatsinnut ajoqutaasinnaavoq, Folketingemi atlantikup avannaani suleqatigiinni ilaasortaq oqarpoq.
Nannutassiissutit tunineqartarnissaanik akuersisoqartinnagu nannut qanoq amerlatiginerat misissorneqartariaqartoq Juliane Henningsenip ilanngullugu erseqqissarpaa.
Isumassarsiap inatsisitigut ajornartoqarnissaa imaluunniit nannut amerlavallaalernissaannut ajornartorsiulersinnaanissaa Juliane Henningsenip takorluunngilaa.
Assersuutigalugu nannut 35-t pisassiissutigineqarneranni taakkunannga 15-it tunineqarsinnaasut, Juliane Henningsen isumaqarpoq.
- Kisianni piniartut kattuffiillu isumaat pingaarnerussapput, Juliane Henningsen oqarpoq.
