Isumassarsiamiit piviusunngortitsineq skemaanniippoq

Villads Villadsenip Efterskolea aappassaa Poul Jensenimit Ineriartortitsinermik suliaqarfimmit INsitu-mit tikeraarneqarpoq.

Ilinniartinneqarnerat inuusuttut suliamik aallaqqaataaniit naggataanut qanoq pitsaanerpaamik suleqatigiillutillu ingerlatsisinnaanerannik imaqarpoq.

- Assimi siullermi takusinnaavarsi inuusuttut sinerissami suminngaanneernertik aallaavigalugu agguataarneqartut. Najukkaminni ilikkarsimasatik nakooqqutigalugit taava isumassarsiamiit piviusunngortitsinissaq suliaraat, Poul Jensen nassuiaavoq.

Assimi tullermi isumassarsiat pappiaramut allattorneqarnerat takuneqarsinnaavoq, tamatumani pineqarluni nipilersorneq - nipilersortarfeqarnermiit tusarnaartitsinermut.

- Ilinniartinneqarneq meeqqat atuarfianni ilinniartitseriaatsimit allaanerujussuuvoq. Inuusuttut sungiusimavaat atuarfimmi ilinniartitsisup naalakkiinissaa, uanili ilinniartut anguniakkat qanoq ilioraanni anguneqarsinnaanerat namminneq ineriartortitseqatigiiffigisarpaat, ilaatigut ajornakusoorsinnaasorujussuusarluni, oqarpoq.

Nuummi meeqqat atuarfiini annerni atuartut aamma Villads Villadsenip Efterskoleani atuartut katillutik 270-it 2010-mi ineriartortitsinermik ilinniartinneqarsimapput.

Ilinniartitsineq Namminersorlutik Oqartussani Inuussutissarsiutinut pisortaqarfik suleqatigalugu ingerlataavoq.