Nina Julielu: Isumassaaleqinarpoq

- Unneqarillunga oqassaguma, ajorinngilara. Isumassaaleqinarpoq, imaluunniit qanoq misiginerlunga oqaatigiuminaatsippara … Tupaqqalaarpunga, ajugaarissarput qularutiginnginnakku.

Nina Kreutzmann Jørgensen arfininngormat unnukkut unammisoqarnerani Julie Berthelsenilu normu 2-nngornermik kinguninngua taama oqarpoq.

AAMMA ATUARUK Julie Ninalu Melodi Grand Priximi 2-nngorput

- Piffissami aggersumi iperaruminaassaaq, pisimasullu eqqarsaatigeqqajaanassallutik, pileruttorluta taava.... Ajoqaaq, Julie Berthelsen oqarpoq.

Nina: Nipilersortartunut nunatsinneersunut periarfissaq nutaaq

Finalimulli annguttut aamma tulluusimaarput, erinarsuutaammi ”League of light” nunatta Danmarkillu atassuteqarnerat pillugu Danmarkimi soqutiginninnermik pilersitsimmat.

Ajugaanngikkaluarlutillu tamanna qujamasuutigaat.

- Radioqarfippassuarnik tusagassiortorpassuarnillu oqaloqateqartarluta ullorpassuit atorpagut. Assut nuannerpoq. Isumaqarpunga angorusutagut sapinngisamik angusimallutigit. Aamma siammaqqissinnaanissaat neriuutigineqarsinnaavoq. Sammineqarnerat saqqumilaartinneqarnerilu ingerlaqqinnissaat kissaatiginarpoq, Julie Berthelsen oqarpoq.

AAMMA ATUARUK Sermersuumi borgmesteri: Julie Ninalu nunatsinnit aallartitaalluarput

Misigisimappullu nunarput kalaallillu nipilersugassiaat Danmarkimi soqutigineqaqqilersut.

- Danmarkimi Melodi Grand Prixip nunatsinnit peqataaffigineqarnera, oqaatsittalu atorneqarnerat. Imaassinnaavormi nunatsinneersut allat aamma misileerusulersut. Misigisarmi pikkunarpoq, nuannerluinnarpoq – aammali sakkortuvoq, Nina Kreutzmann Jørgensen oqarpoq.

- Taama oqarfigissanngilagut. Oqarfigissavagut: ’Nuannersupilussuuvoq. Tamarmik aappaagumut erinarsuummik ilanngussiinnassapput’. Isumaqarpunga pitsaasumik atassuteqarnerput pillugu (nunatta Danmarkillu akornanni, aaqq.) ammaassilluta, atassuteqarnitsinnimi pitsaasut suli pigivagut, Julie Berthelsen oqarpoq.

AAMMA ATUARUK - Qilanaaqaagut, pissangaqalutalu!

Aammali ajortuinnaanngilaq. Nina Kreutzmann Jørgensenimmi normu 2-nngornermikkut nunani tamalaani Melodi Grand Prix Israelimi Tel Avivimi maajimi pisussanngorpat ilaasussaajunnarpoq,m ilaqutariinni pingaartorsiornerup nalerpiaani.

- Taamaattussaasimagami taamaappoq. Taamaalillunga panima apersortinnerani peqataasinnaassaanga. Tamannalu ajunngilluinnarpoq! KNR-imut oqarpoq.

Aamma normu 2-nngorneq ajoriinnagassanngitsoq isumaqarput.