Isumasiuisarfik: Kalaallit Nunaanni pujortartartut ikiliartorput

Kalaallit Nunaanni pujortartartut ikiliartorput. Isumasiuisarfiup HS Analyse-p misissuisimanerata takutippaa nunatsinni innuttaasut 50 procentii pujortartut.

Ukiut arfineq-marluk matuma siornatigut, tassa 1998-imi PAARISA misissuisitsimmat paasinarsivoq nunatta inuisa 69 procentii pujortartartuusut. Kisitsit taanna ullumi 50 procentiinnanngorsimavoq.

PAARISA-mit anguniagaavoq pujortartartut 50 procentiinnanngorsimanissaat, taannali ukioq 2007-imi aatsaat anguneqarnissaa siunertaasimagaluarluni.

Peqqinnissamut pisortaqarfimmi pisortaq Søren Rendal oqarpoq taaamaanneranut arlalinnik pissuteqartoq:

- PAARISA aqqutigalugu paasisitsiniaaneq annertooq ingerlassimavarput. Atortussat paasissutissallu atuarfinnut allanullu neqeroorutigisarsimavagut, ”Atuaqatigiit pujortartanngitsut 2005”-imik taallugu aamma unammisitsivugut, kiisalu peqqissuunissaq pillugu pilersaarummi innuttaasut oqalliseqataalluarsimanerat pujortartartut taama ikilitigismanerannut pissutaasimassagunarput, Søren Rendal oqarpoq.

Isumasiuisarfiup HS Analyse-p misissuisimanerata takutippaa nunaqarfimmiut pujortarnerpaajusut – siornatigutulli annertutiginani. Kujataani pujortartartut amerlanerpaajupput, Nanortallip Paamiullu kommuniini pujortartartoqarnerpaajummat. Qeqqani kommunit pujortartartukinnerpaajupput, tassa Sisimiut, Maniitsup, Nuullu kommuniini pujortartartut ikinnerpaajummata.

Pujortartarnerup peqqissutsimut navianaateqarnera PAARISA-mit paasisitsiniaassutigineqarsimavoq. Nuummi aqqusinermi naapitatsinnik isumasiuilaarpugut. Stinap ullormut cigarettit qulit missaanniittut pujortartarpai, paasisitsiniaanerillu sunniuteqarpallaarsimanngillat:

- Paasisitsiniaanerit uannut sunniuteqarpallaanngillat, kisiannili meeqqanut sunniuteqarsimasut isumaqarpunga. Pujortarnissamut ussernartorsiornerminni meeqqat eqqarsarnerulersimapput, Stina oqarpoq.

Pujortartartoq alla, Kristine, ullormut 20-t pujortartarpai, taassumalu erseqqinnerusumik paasisitsiniaasoqarnissaa ujartorpaa:

- Illoqarfimmut sumulluunniit angalagaluaraanni ersittoqarneq ajorpoq paasisitsiniaasoqarneranik, Kristine oqarpoq

Pujortartartut ikilisimanerat nunatta karsianut sunniuteqanngitsuunngilaq. 1998-ip kingorna tupanut akitsuutit marloriarlugit qaffanneqartarsimagaluarlutik tupanut akitsuutinit isertitat annikilliartuinnavissimapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat