Isumasiuipallannermi Siumut ataasiinnamik ikinnerussuteqarallarpoq

Siumut IA-llu nunatsinni partiitut anginersatut inissinniarnerat manna tikillugu imatorsuaq pissanganartutut oqaatigineqarsinnaanngilaq.

Tamanna takuneqarsinnaavoq, KNR-ip oqaluttuarisaanerani isumasiuipallanneq aatsaavissuaq misilinneqartoq naapertorlugu.

Inuit 1.237-it isumasiuipallannermi peqataasimapput, taakkunannga 237-it imaluunniit 27,6 procentit IA qinersimavaat, Siumut kisitsimmik ataasiinnarmik nikingalluni malinnaavoq, ataasiinnarmik ikinnerussuteqarluni.

Demokraatit tullinnguupput, taakku 24,6 procentinik pissarsigallarsimallutik.

Qaqortumi, Nuummi Aasiannilu ilinniarnertuunngorniat, Sisimiuni qaffasinnerusumik ilinniagallit, tassa HTX-imik ilinniagallit, aamma Ilulissani STI-eertut isumasiuipallannermik ingerlatsipput.

Inuusuttut taakku illoqarfimminni qinersivinni qinersiviillu silataanni ulloq naallugu malinnaassapput, inuillu qinersiartoreersimasut kina partiiluunniit sorleq qinersimaneraat aperisassallugit. Ilinniartut ulloqeqqalivissoq KNR-imut sianerput, kisitsisit siulliit manna tikillugu qanoq isikkoqarnersut ilisimatitsissutigalugu.

Kisitsisit qinersinerullu qanoq ingerlanera malinnaavigerusukkaanni KNR-ip nittartagaa ullup ingerlanerani aamma alakkallattaarneqarsinnaavoq, tassaavoq knr naggat gl