Isumasiuinerup IA pingaarutilittut inissippaa
Inatsisartunut qinersinissaq sapaatip akunnerani tullermi pisussaq pissanganartorujussuuvoq.
Aviisip Sermitsiap qinersisartunik isumasiueriarluni qinersisoqannginnerani misissuinini aqagu saqqummersissavaa.
Qinersinissarlu naammasseriarpat periarfissat arlaqarpasipput.
Misissuinerup inerneri misissualaarlugit takusinnaavarput partiit tamarmik inatsisartunngortussani ilaasortaatitaqalersussaagamik ajugaasutut taaneqarsinnaasut. Taamaakkaluartorli ajorsartussatut ilimagineqartoq siulliutilaariartigu.
Isumasiuineq malillugu Atassut inatsisartuni tallimanik ilaasortaatitaqalissaaq. 2002-imi qinersinermut sanilliullugu ilaasortaatitassai marlunnik ilanngassapput.
Kattusseqatigiit Partiiata ilaasortaa nikissanngilaq.
IA-p ilaasortaatitai arfineq-pingasut nikissanngillat.
Demokraatit pingasunik ilassapput, tallimaariarlutik arfineq-pingasunngussagamik.
Siumup ilaasortaatitai ataatsimik ilanngassapput, qulingiluanngorlutik.
Qinersisartunik isumasiuineq tusariigarput eqqussagaluarpat qanormita naalakkersuisunngortoqassava?
IA pingaarutilittut inississaaq, Siumukkut Demokraatilluunniit naalakkersuisooqatigilersinnaallugit.
Partiit sorliit suleqatigiinnissaat isumasiuinermi aamma apeqqutigineqarsimavoq.
IA-kkut Demokraatillu suleqatigiinnissaat amerlasuunit kissaatigineqarpoq.
IA-kkunnik taaserusuttut 63 procentiisa IA-kkut Demokraatillu suleqatigiinnissaat kissaatigaat.
Demokraatinillu taaserusuttut 60 procentiisa IA-kkut suleqatigiinnissaat kissaatigisimallugu.
Partinik taakkunannga marlunnik taaserusuttut suleqatigiittoqarnissaanik kissaateqaraluartulluunniit Siumut ersarilluinnartumik inissisimavoq.
Siumukkunnik taaserusuttut 67 procentiisa Siumukkut IA-kkullu suleqatigiinnerisa ingerlaannarnissaat kissaatigaat.
Tamannali marlunngorpat qinersisoqareerpat paasinarsissaaq.
HS Analyse qinersisartunik isumasiulluni misissuisuuvoq. Isumasiuinermi qinersisartut 612-t oqarasuaatikkut apersorneqarsimapput.
Sermitsiami aqagu saqqummersussami tamanna atuarneqarsinnaaavoq.
