Hans EnoksenAssi: KNR

Isumasiuineq: Partii Naleraq pingaarutilerujussuussaaq

Novembarip 28-ani Inatsisartunut qinersisoqarpat Partii Naleraq siuariarujussuassangatinneqarpoq. Hans Enoksenili tamassuma oqaaseqarfiginissaa suli tunuarsimaarfigaa.

Qinersisartunik isumasiuinermi nutaami IA-p ajugaanissaa siulittuutigineqarpoq, Naalakkersuisunulli issiatitaqalissappat partii ikiorneqartariaqassaaq.

Epinionip KNR sinnerlugu qinersisartunik isumasiuinerani Siumut 29,3 procentinik taaneqassasoq siulittuutigineqarpoq, kiisalu Inuit Ataqatigiit qinersinermi ajugaassallutik tassalu 36,9 procentinik taaneqarnissaat siulittuutigineqarluni.

Aamma atuaruk IA partiit anginersarilissavaat

Nunatsinni partii nutaanerpaaq, Partii Naleraq, 14,8 procentinik taaneqarluni Inatsisartunut isissangatinneqarpoq, tassalu siuariarujussuassangatinneqarluni, taamaalillunilu kikkut naalakkersuisunngornissaannut aalajangiisunngorsinnaalluni.

Naleqqalli siulittaasuata Hans Enoksen-ip partiit sorliit suleqatigissanerlugit maannakkut tikkuaanianngilaq.

-  Partii Naleqqap siulersuisuuneri inatsisartunullu qinigaasut aalajangiisuussapput kikkut suleqatigineqarnissaannut, Hans enoksen oqarpoq.

Aamma atuaruk Qinersisartut amerlanersaasa aningaasaqarneq pingaarnerpaatikkaat

Partiimi tapersersorneqarnerujussua taassuma tupaallaatiginngilaa.

- Uppernarsaqqissaarneqarluni ulluinnarni inuuniarnikkut qanoq atukkat ilungersunarsiartortigisut, tassa ajoraluartumik inoqaterpassuagut pissaqarniarnikkut katakkiartuinnarpagut, taakkulu oqilisaaffigineqarnissaanik oqariartuuteqarnerput taanna paasilluarneqarlunilu taperserneqarmat nuannaarutigaarput, Enoksen oqarpoq.

Epinionip isumasiuinera pillugu paasissutissat

  • Isumasiuineq Nunatsinni innuttaasut 731-t nalaatsornerinnakkut toqqakkat apersorneqarnerinik toqqammaveqarpoq.
  • Paasissutissanik katersuineq piffissami novembarip arfernanit 17-ianut ingerlanneqarpoq. Apersuisut marluinnik oqaaseqartuupput apersorneqartullu kalaallisut danskisulluunniit akissuteqarnissaminnut periarfissinneqarlutik. Apersorneqartut 87 %-ii kalaallisut akissuteqarput 13 %-illu danskisut akillutik.
  • Oqarasuaatit normui atorneqartut TelePostimit pissarsiarineqarput, tassaallutillu oqarasuaatit nalinginnaasut, angallattakkat aammalu Tusassillit normui.
  • Kisitsisitigut paasissutissat nangaanartoqassusiat  annerpaamik +/- 3,6 procentiuvoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat