Isumasiuineq: Naalakkersuisooqatigiit ingerlaqqiinnarsinnaapput
Demokraatit IA-lu katillutik 16-inik isertitaqassasut, kisiannili aamma Anthon Frederiksen allamik suliffissarsiortariaqalissasoq isumasiuinermi takuneqarsinnaavoq. Kattuseqatigiit Partiiat 0,8 procentiinnarnit qinissamaarneqarpoq, partiitullu oqaluttuaannanngussagunarluni.
-Uanga sisamanik isertitaqarnissarput ilimagaara, qinigaanermilu tulliani aamma Naalakkersuisunut ilaasortaatitaqarnissarput pimoorukkipput qularineqassanngilaq. Sulimi naammassisassaqarpugut. IA kisiat imaluunniit partiinik allanik suleqateqarniassanersugut maanakkut iusmmerfigerusunngilara. Partiimmi sorliit qinerneqarnerusut sunik akerleriissuteqarlutillu sukkut suleqatigiissinnaassanersut apeqqutaassaaq, Demokraatit siulittaasuat Jens B. Frederiksen knr.gl-imut nassuiaavoq.
Nunatsinni partiit illuatungiliuttut annersaat Siumut, kingullermik qinersinermut sanilliullugu 12 procentpointinik siuariassangatinneqarpoq. Ajoraluartumilli Siumup 12-inik isertitaqarluni siuariarneq Aleqa Hammondip iluaqutigisinnaagunanngilaa, tassa HS Analysep isumasiuinera naapertorlugu.
Atassut 5 procentpointinik kinguariarluni 2009-mi isertitami pingasut ilaat marluk isertinniarsariaqassavaat. Atassutip kikkulluunniit suleqatigisinnaassavai, aamma maannakkut Naalakkersuisooqatigiit. Atassutip taamaalilluni pissaaneqaqqilerluni siunissami patajaallisaasinnaalissaaq.
-Kingullermik qinersinermut sanilliullugu kinguariarnissarput naammaginanngilaq. Taamaammat qinersilivinnitsinni nalornisut Atassummik qinersitinniarlugit suli sakkortunerusumik sulisariaqarpugut. Qineqqusaaruteqarpugummi partiit allat pingaarnerutinngisaannik. Tassani eqqarsaatigaakka nammineq initaarniarnermi pissutsit kiisalu erniat akileraarutigineqartannginnissaat. Qinersisap tungaanut ulapputissaagut, neriulluta Inatsisartunut pingasunik ilaasortanngortitsisinnaassalluta, marsip 12-ianni inuusuttoq Atassutip Inatsisartunut ilaasortanngortissallugu piukkutaa, Steen Lynge oqarpoq.
Partii Inuit Inatsisartuni ataatsimik ilaasortaatitaqalernissaa ilimagineqarpoq. Partiimik aallartitsisoq Nikku Olsen imaluunniit soorlu Randi Broberg ilaasortanngusanersoq suli nalunarallarpoq. Qinerneqarluarunik aamma saamerliuniat nutaat marlunnik ilaasortaatitaqalersinnaagunarput. Siumukkutulli kalaaliussutsimik pingaartitsinermikkut assigiikkamik, Partii Inuit marlunnik isertitaqassappata Siumukkut aamma marluinnarnik isertitaqassapput. Siumukkut siunissami aamma, kiisalu Partii Inuit maannakkut taamatut qinersiseqartassagunarput.
Naatsorsueqqissaarneq uppernavissunngilaq aammami Kalaallit Nunaanni qinersisartut sisamaagaangata ataatsip partii sorleq qinissanerlugu suli aalajangersimanngillat.
Isumasiuineq naliliinerillu Sermitsiami nutaami atuarneqarsinnaapput.
