Sermitsiami ullumi saqqummertumi Inatsisartunut sapaatip-akunnerani tullermi qinersinissamut atatillugu isumasiuinerit kingulliit atuarneqarsinnaapput.
2002-mi qinersinermut naleqqiullugu Siumup ilaasortaatitassai ataatsimik ikileriassapput, qulinit qulingiluanut. Atassut marlunnik aamma kinguariassaaq, tallimanik ilaasortaatitaqalissalluni.
Inuit Ataqatigiit allannguuteqassanngillat, arfineq-pingasunik ilaasortaatitaqalissallutik. Kattusseqatigiit Partiiata ataatsimik ilaasortaatitaqarnerat allannguuteqassanngilaq.
Demokraatit isumasiuinermi ajugaasuupput, ilaasortaatitaat tallimanit arfineq-pingasunngussangatinneqarmata.
Inatsisartunut qinersineq taama inerneqassappat Inuit Ataqatigiit pingaarutilittut inississasoq – taamalu Siumut Demokraatilluunniit naalakkersuisooqatigileriaannaassagai, isumasiorneqartut isumaqarput.