Isumasioqatigiissitsineq: Innuttaasoq qitiutillugu aamma inuiaqatigiit nukittorsarneqarnissaat
Ippassaq ulloq tassaavoq innarluutillit nunarsuaq tamakkerlugu ulluat.
Nuna Tamakkerlugu Innarluutilinnut Sullissiviup pilersinneqarnissaanut atatillugu decembarip ulluisa aappaanni aallartittumik ullumi naammassineqartumik isumasioqatigiittoqarpoq.
Inuit katillugit 35-t isumasioqatigiissitsinermi peqataapput, ilaatigut tassaallutik ulloq unnuarlu angerlarsimaffinni najugaqaqatigiiffinniluunniit siulittaasut, innarluutillit soqutigisaqaqatigiiffiinit aallartitat, sullissisartut tagiartuisartullu, kommuninit sisamanit.
Innarluutillit pillugit isumaqatigiissut, tassungalu atatillugu tamakkununnga tunngasutigut suleqataasunut attuumassutilinnut suleqatigiiffissatut periarfissat qanoq ililluni pilersinneqarsinnaanersut isumasioqatigiinnermi ilaatigut sammineqarput, soorlu aamma innarluutilinnut kattuffiit qanoq ililluni pitsaanerusumik suleqatigineqarsinnaanersut eqqartorneqartoq.
Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen isumasioqatigiinneq pillugu ima oqarpoq:
- Nuannaarutigaarput isumasioqatigiinnermi matumani peqataasinnaagassi, taamaasillusi periarfissaqassagassi innarluutillit pillugit nalunaarusiassap inatsisissallu imarisassaannut sunniuteqaqataanissamut.
