Isumasioqatigiinnermut attuumassuteqartut aggersarneqanngillat
Ilulissat eqqaanni qaleralinniarneq pillugu isumasioqatigiinneq aqagu ataasinngornermi Ilulissani ingerlanneqassaasq, Qaasuitsup Kommuniata nittartagaani taama allaaserisaqarput.
Ilulissat eqqaani qaleralinniarneq kisiat pillugu isumasioqatigiittoqassaaq kingusinnerusukkullu Uummannami Upernavimmi, taakkualu nunaqarfiini ingerlanneqarumaarluni.
Qaleralittassiissutigineqartartut, aqutsineq nunamilu tunisassarsiorneq isumasioqatigiinnermi oqaluuserineqassapput.
Qaleralittassiissutigineqartartut siunissami kikkunnit aqunneqartassanersut isumasioqatigiinnermi isumaqatigiissutigineqarnissaa neriuutigineqarpoq.
Kommunemi isumaqarpoq piffissanngortoq nutaamik eqqarsarnissaq, ukiut kingulliimmi takutippaat ajorluinnartumik kingunerluttumillu qitiusumit aqutsiniartoqarpallaartoq.
Qaassuitsup Kommuniani kommunalbestyrelsemi ilaasortaq Ane Hansen tusagassiuutinut allagaqarluni tupaallaatigaa isumasioqatigiissitsinissamut kommunalbestyrelsemi ilaasortat ataatsimiititalianilu siulittaasut ilisimatinneqarsimannginnerat aammalu peqataanissaannut aggersarneqarsimanngimmata.
Isumasioqatigiisitsineq isumassarsiorfittut isornartorsiunernillu imaqarniartussaagaluarpoq ilaatigut politikkikkut suliaqartunut, Ane Hansen isumaqarpoq.
Isumasioqatigiinnissamut Qasigiannguarmiut, Qeqertarsuarmiut, Aasiammiut, Kangaatsiarmillu aggersarneqarsimannginerat erseqqissaatigaa.
Atueqataasut allat peqataasinnagit politikkikkut isummersortitsineq uparuartuisitsiniarsarinerlu illuinnaasiorneruvoq kommunillu ataatsip iluani innuttaaqatigiinnik avissartuttitsiniarneruvoq akuersarneqarsinnaangitsoq, Ane Hansen oqarpoq.
Taanna isumaqarpoq isumasioqatigiinneq illuinnaarsiornerusoq, kommunemimi tamarmi qaleralinniarnermut attuummassuteqartut ilisimatinneqaratillu aggersarneqanngimmata.
- Pissutit taamatut ineriartornerat toqqissisimananngilaq, piumasarsornerlu unitsinneqartariaqarpoq kommunalbestyrelse-milu ilaasortat Ilulissat avataaniittut politikkikkut oqallinnermi isumasioqatigiisitsinermilu peqataatinneqartariaqalerput, Qaasuitsup kommuniane kommunalbestyrelsemi taamatullu inatsisartuni IA sinnerlugu ilaasortaq Ane Hansen allappoq.