Isumasioqatigiinnerit malitseqassapput

Inuussutissanik ineriartortitsinissamik pilersaarutit Kalaallit Nunaani takornariaqarnermi inuussutissarsiornermilu Siunnersuisoqatigiinni malitseqartinnissaat sulissutigineqalerpoq.

Isumassarsiatsialaat qulit missaaniittut Narsami inuussutissalerinermi ilinniarfimmi Inuili-mi, arfininngormat sapaatiummallu piviusunngortitassat saqqummerput. Suliassat akisussaasunik inuttalersorneqarput aammali akisussaasuulersut Kalaallit Nunaani Takornariaqarnermi Inuussutissarsiornermilu Siunnersuisoqatigiinnit, GTE-mit, inuit taakku akuttunngitsumik attavigineqartassapput suliaat sumut killinneraat paasiniarneqartassalluni. Suliat taamaattut saniatigut GTE–imi sulisut aamma suliaraat, isumassarsiarpassuit qarasaasiamut iimiullugit nalunaarsorneqarnissaat.

Siunnersorti Anders la Cour Vahl, GTE–meersoq oqarpoq, suliatik naammasseriarunikkit qarasaasiakkut alakkarneqarsinnanngussasut kikkunullu tamanut soqutiginittunut timitalersoqqullugit neqeroorutigineqassasut.

Inuussutissarsiutaasinnaasunik aallartitsiumallutik nalunaartut GTE –minngaanniit aamma neqeroorfigineqassapput timitaliiniarnerminni pilersaarusioqatigissallugit.

Ataatsimut oqaatigalugu, qanoq iliorunik, suullu aqqutigalugit ikiorserneqassanersut siunnersorneqassapput.

Inuussutissanik ineriartortitsinermi suliaqartunik taakkununngalu attaveqaataasinnaasunik ujarlernissaq suliakkiissutigineqartut ilagaat.