Isumasioqatigiinneq naammassivoq
Qeqertarsuup Tunuani aalisarnikkut tunisassiorfeqarnikkullu pissutsit ilungersunartut pillugit Qasigiannguani isumasioqatigiittut, Ilulissat Qasigiannguit Aasiaallu kommuniineersut isumasioqatigiinnertik naammassivaat ataatsimoortumillu oqaaseqaateqarlutik.
Qasigiannguani isumasioqatigiittut tunitsiveqarnikkut ataqatigiimmik ingerlatsisoqannginnera raajarniarnermilu aalisartunut atugarititaasut assigiinnginnerat sakkortuumik uparuarpaat.
Pissutsit assigiinngitsut aalisarnermut annertuumik innarliisutut isumasioqatigiittunit tikkuarneqarput.
- Qeqertarsuup Tunuani sulisussaaleqineq pissutigalugu raajanik ataavaartumik tunioraasinnaaneq mattunneqarpoq taamaalillunilu aalisartut aningaasarsiorsinnaanerat mattunneqarluni, isumasioqatigiittut allapput.
Qeqertarsuup Tunuani tunisassiorfituaasumi sulisussaaleqineq pissutigalugu tigooraasinnaanenerup annikillileriffigineqarnera aammalu tunitsivinniit naalakkiutaasumik utaqqisitaasarneq sakkortuumik uparuarneqarput. Raajat avannarpartut tunitsivissat kujammut nuukkiartorneqarnerat aamma tupigusuutigineqarpoq.
Sulissaaleqisarneq karsinullu sikussaaleqisarneq aammalu tunisassiorfiup tigusinnaanerata killeqartarnera aalisartunut uninngatitsisarpoq, tamannalu pissutigalugu pisassat tamakkinngitsoorneqartarlutik, pissutsit tamakku pissusissamisuunngilluinnartut piaarnerpaamik aaqqiivigineqarnissaat Aasiannilu raajaleriffiup piaarnerpaamik ammarneqarnissaa isumasioqatigiinniit piumasarineqarpoq.
Isumasioqatigiinniit oqaatigineqarpoq pissutsit aaqqinneqassappata aalisartut aningaasartuuteqartinneqarnerat appartinneqartariaqartoq tulaassallu akitigut aaqqiivigineqartariaqartariaqartut.
Ilulissat Qasigiannguit Aasiaallu kommuniisa Qeqertarsuuo Tunuani aalisarnikkut pissutit ilungersunarsiartornerat pillugu isumasioqatigiinnerannut Royal Greenland aamma qaaqqusaasimagaluarpoq peqataatitaqarsimananili.
Oqaaseqaammi ilaatigut atuarneqarsinnaavoq, piujuaannartitsinissaq toqqammavigalugu aalisartoqarnissaa isumaqatigiissutaasoq. Aamma piffinni aalajangersimasuni atortutigut killilersuinerit ingerlanneqartarsinnaanerat, sumiiffinnilu aalajangersimasuni qassusersorluni siunissami aalisarsinnaanerup killilersorneqartariaqarnera, ilaatigullu inerteqqutaasinnaanera, tikkuarneqarput.
Isumasioqatigiit aamma tikkuarpaat, qalorsuit atorlugit avataani qaleralinniarneq killilersimaarneqartariaqartoq ”karsinik” eqqussisoqarneratigut kiisalu avannarpasissuseq 69-ip avataani kilisalluni qaleralinnik aalisarnermut killiliunneqartariaqartoq. Taamatuttaaq atortorissaarutit nutaat atuutilernerini, soorlu auto-line-nik taaneqartartut, misilittagaqartut peqatigalugit malittarisassiuunneqarnissaat siunissami ingerlanneqartalissasoq kaammattuutigineqarpoq.
