Isumasioqatigiinneq Danmarkimi inuussutissarsiutilinnut iluaqutaassaaq

Isumasioqatigiinnermi pingaarnertut qulequtarineqarput - Nunatsinni inuussutissarsiornikkut inerisaanissamut periarfissat aamma suleqatigiinnissamut aqqutissat periarfissallu.

Inuit Ataqatigiit, Avalak Sulisitsisullu Kattuffiat, GA, Nunatsinni inuussutissarsiorneq pillugu Christiansborgimi Landstingsalenimi isumasioqatigiisitsinerat ingerlanneqaqqammerpoq. Isumasioqatigiinnermi pingaarnertut qulequtarineqarput - Nunatsinni inuussutissarsiornikkut inerisaanissamut periarfissat aamma suleqatigiinnissamut aqqutissat periarfissallu.

Inuit Ataqatigiinnersoq, Sara Olsvig, aaqqissuisunut ilaavoq pissarsiaqaatigilluakkaminik:

- Ilaatigut erserpoq inatsisiliortoqaraangat Nunatta Danmarkillu akornanni suliassaqarfinnut danskit suli akisussaaffigisaannut attuumassuteqartunut, taava ataqatigiissaarineq Nunatta Danmarkillu akornanni annertunerusariaqartoq, Folketingimi ilaasortaq, Sara Olsvig (IA), oqarpoq.

Inuussutissarsiornermut Aatsitassanullu Naalakkersuisusoq, Jens-Erik Kirkegaard, aamma SIK-p siulittaasua Jess G. Berthelsen, isumasioqatigiinnermi saqqummiussisut ilagaat. Isumasioqatigiinnermi peqataasut 150-it pallillugit peqataapput, tassaasut kalaallit danskillu politikerii aamma Danmarkimi, Savalimmiuni Kalaallit Nunaannilu inuussutissarsiuteqartut kiisalu kalaallit Danmarkimi ilinniagaqartut aallartitaat.

Sara Olsvigillu maluginiarsimavaa isumasioqataasut arlallit inuussutissarsiutit allat ineriartortinneqarnissaannut ujartuisut:

- Taava aamma ilaatigut tikkuarneqarpoq inuussutissarsiutit allat, aatsitassarsiornerup saniatigut ineriartortinneqarnerusariaqartut. Soorunami aalisarneq aatsitassarsiornerlu ineriartortinneqassapput, kisianni aamma allanik ujartuisariaqarpugut, taakkunanngalu aamma piorsaanerusariaqarluta, Sara Olsvig (IA) oqarpoq.

Sara Olsvig isumaqarpoq isumasioqatigiinneq Danmarkimi periutsinut, danskit politikeriinut Danmarkimilu inuussutissarsiornermik suliaqartunut attaveqarnermut iluaqutaassasoq. Sara Olsvigip pingaartissimavaa kalaallit Danmarkimi ilinniartut sapinngisamik amerlasuut isumasioqatigiinnermi peqataanissaat, taamaaliornikkut Danmarkimi inuussutissiornermik suliaqartunut attaveqalissammata:

- Inuussutissarsiorneq pillugu isumasioqatigiinnerit arlallit Nunatsinni ingerlasarput. Massakkut una toqqarparput maani Christiansborgimi pissasoq kalaallit ilinniartut Danmarkimiittut qanimut attaveqarfigerusullugit. Taavalu aamma danskit politikerii qanimut attaveqarfigerusullugit. Suleqatigiiffissamillu ujartuilluta. Tamannalu isumaqarpunga ullumikkut aallarnerneqarluartoq, Sara Olsvig (IA), oqarpoq.

Inuussutissarsiorneq pillugu isumasioqatigiinneq tallimanngormat ualikkut ingerlanneqarpoq. Jonas Løvschall-Wedelip Sara Olsvig apersoraa, Kathrine Kruse ilanngutassiamik suliarinnippoq