Isumasioqataasut pissarsilluarput

marsip 24-at 2007 15:58

Inuussutissat pillugit Maniitsumi isumasioqatigiinneq pingasunngornermiit tallimanngornermut ingerlanneqartoq naammassineqarpoq, Maniitsumilu aaqqissuisut pissarsilluartutut misigisimapput. Nunani allani ingerlariaatsit pillugit Kalaallit Nunaata ilinniarfigisinnaalluarai, isumasioqatigiinnermi peqataasoq Arctic Green Food-imeersoq, Tina Donnerstag oqarpoq:

- Saqqummiunneqartut assigiinngitsorpassuit soqutiginarluinnartut tusarpagut. Nunarsuarmioqataasut ilisimariigaat misilittagaallu paasissallugit amigaatigisarpagut. Taamaammat isumasioqatigiinneq pissarsiffigilluaqaarput, Tina Donnerstag oqarpoq nangillunilu: Island Savalimmiut Danmarkilu inuussutissat pillugit iliuuserisartagaat uagutsinniit siuarsimanipilussuupput. Taakkualu uagutsinnut oqaluttuarput, nunatta pissarititai qanoq ililluta pitsaanerusumik atorsinnaanerigut, tina Donnerstag oqarpoq.

Inuussutissarsiutit pillugit Maniitsumi isumasioqatigiinnermi KNAPK-mit aallartitaasoq Ludvig Hansen, isumaqarpoq, Islandip aalisakkanik tunisassiassanik assartueriaasia soqutiginaateqartoq.

- Islandimim avammut toqqaannartumik aalisakkanik tuniniaasarnerat pissarsiffigilluarpara, nalunngilarpummi nunatsinninngaanniit nunanut allanut tunisassiorniartarnitsinni angallanneq akisuupilussuusoq. Taama oqarpoq KNAPK-p aallartitaa Ludvig Hansen.

Inuussutissat pillugit isumasioqatigiinnermi eqalussuup inuussutissatut qanoq atorluarneqarsinnaanera paasigitsik Tina Donnerstag oqarpoq:

- Bioteknologi atorlugu peqqinnartunillu nerisassiornermik Savalimmiormiut tunisassiortartut aamma pissarsiffigilluarpagut. Soorlu kalaalli nunaanneersoq eqalussuaq atorluarneqarsinnaavoq. Tassa eqalussuup tingua uulialiaralugu inuussutissatut pitsaasutut tunisassiarineqarsinnaavoq. Taamaammat eqalussuup tinguanik misiliummik misissugassamik nassiussinialerpugut. Atorneqarsinnaassappat suleqatigiissinnaanerput paasinarsissaaq, Tina Donnerstag naggasiilluni taama oqarpoq.

Nunatsinni angallannerup eqaallisarneqarnissaa, isumasioqatigiinnermi peqataasut kissaatigaat.