Isumaqatiginninniarnermut immikkut ilisimasalik: Motzfeldtip USA-mi isumaqatiginninniarneq ima ajugaaffigisinnaavaa
- Isumaqatiginninniarluni ataatsimiinnermi, tunniutiinnartinneqarsinnaannginnermik illuatungerisalli aamma tunniutiinnartinnissaannik kissaateqannginnermik pissusilersorlunilu nipeqarnissaq pingaaruteqarpoq.
Syddansk Universitetimi politikikkut isumaqatiginninniarneq pillugu ph.d-liortoq aamma Aarhus Universitetiani lektori, Mikkel Gudsøe oqarpoq.
Vivian Motzfeldtip (S) Amerikamiut nunanut allanut ministeriat aamma præsidentip tullersortaa danskit nunanut allanut ministeri, Lars Løkke Rasmussen (Moderaterne) peqatigalugu Præsidentip Illorsuani pingasunngornermi ataatsimeeqatigissavai.
Donald Trumpip ’Kalaallit Nunaannik piginnittuuneq eqqarsartaatsikkut pingaaruteqartoq’ oqaatigereeraalu ataatsimiittoqartussanngorpoq.
Nunanut allanut naalakkersuisup, Vivian Motzfeldtip (S) nunatta tuniniagaannginnerata oqaatiginissaa ataatsimiinnermi periuserissallugu KNR-imut tallimanngornermi oqaatigaa.
Tamatuma saniatigut aqqutit eqqortut aqqutigalugit pitsaasumik oqaloqatigiittoqarnissaa aamma nunat tamalaat inatsisaat, inuit pisinnaatitaaffii, nunatsinnilu nunatta inuisa namminneq siunissaminnik aalajangiisussaanerat ataqqillugu suliat ingerlanneqarnissaat kaammattuutigaa.
Mikkel Gudsøe-ip Vivian Motzfeldtip Lars Løkke Rasmussenillu eqqissisimanissaat pingaaruteqartoq oqaatigaa.
Taamaanngippat ataatsimiinneq Ukrainimiut præsidentiata, Volodymyr Zelenskyjip Præsidentip Illorsuani ataatsimeeqatigineqarneratulli inerneqarsinnaavoq.
Qanimut suleqatigiinneq
J.D. Vancep ataatsimiinnermut aamma peqataasussanngornerata saqqummiunneqarnera ataatsimiinnissamik 'annertunerulersitsinertut' Isumaqatiginninniarnermi immikkut ilisimasallip taavaa.
Tamanna nunanut allanut ministerit akornanni taamaallaat ataatsimiinnerunani kisianni aamma præsidentimut qanittumut aporaaffiusunik takutitsisimasumut qanillineranik tunngassuteqarpoq.
Ukrainimiut præsidentiata præsidentip tullersortaata akissuteqarfigeriarsinnaanngisaanik oqaaseqarnerata kingorna taanna appisaluunneqartoq, Mikkel Gudsøe-ip nassuiaatigaa.
- Zelenskyjip Vance oqaaseqarfigaa, taamaalilluni taassuminnga saassunneqarluni.
Taamaammat præsidentip tullersortaa akerlilersorneqaannarani ernumassutaanik akuersaartoqarnissaa immikkut ilisimasallip pingaartuunerarpaa.
- J.D. Vance ataatsimiinnermi pimoorussitinniarlugu, Amerikamiut eqqasuutaat akuersaarlugit kisianni aamma eqqasuutaat pillugit aaqqiissutissat pillugit oqaloqatigiinnermik, isumaqatiginninniarnermi periuseqartoqassaaq, Mikkel Gudsøe oqarpoq.
Saamasoq sukangasoorlu
Nunanut allanut tunngasunut ministerip præsidentillu tullersortaa Vivian Motzfeldtimut Lars Løkke Rasmussenimullu ‘saamasoq sukangasuumillu’ periaaseq isumaqatiginninniarnermi periutsitut atoratarsinnaagaat, Mikkel Gudsøep nalilerpaa.
Immikkut ilisimasallillu Kalaallit Nunaata Danmarkillu isumaqatiginninniarnermi periuserisatik uani imminut ataqatigiissaarluarnissaat pingaaruteqarnerarpai.
- Assersuutigalugu: Lars Løkke Rasmussen Kalaallit Nunaannik illersuinnginnerarneqarpoq, taava taassuma Motzfeldtillu isumaqatigiissimanissaat pingaaruteqassaaq, tassa ikiuilluni Natomi qanimut suleqatigiinnermut tunngasumik oqaaseqarnissaa, Mikkel Gudsøe oqarpoq.
Taavalu politikerit tamarmik Amerikamiut eqqunngitsumik oqaaseqassagaluarpata eqqissisimaniarsarissapput.
- Isumaqatiginninniarnermi periaatsit taama ittut piareersarluarfigisimagaanni ingerlalluarneqarsinnaapput. Sianiutinik misigissutsinillu aqutsisinnaalluartoqassaaq, taamaalilluni qisuariartitsiniutit, nikassaasut uppernarsarneqanngitsulluunniit eqqarsaqqaarani qisuariarfigineqassanngillat.
- Uanilu nipaannerusumik akissuteqartoqassalluni.
Kalaallit Nunaata Danmarkillu Amerikamiut politikeriinut oqaloqatiginninneq kisimi uani ilikkagaqarfigissanngilaat.
Innuttaasut aamma pingaaruteqarput.
Inuiannut oqalugitsi
Kalaallit Nunaanni Danmarkimilu innuttaasut aaqqiagiinngissuteqarnermut paasinninnerat atorluarsinnaagaat, Mikkel Gudsøep oqaatigaa.
- Zelenskyj-doktrinen, tunngavigalugu atorsinnaavaat. Tassa imaappoq, tusagassiortut Fox News CNN-ilu pulaartoralugit, USA-mi politikerinut Amerikamiunullu toqqaannartumik oqariartuuteqartillugit, taanna oqarpoq.
Tassani Vivian Motzfeldtip Donald Trumpimut naleqqutinngitsumik quiassuaatiginnillunilu ajortisaarinissaa pinaveersaarlugu Kalaallit Nunaata oqariartuutai apuutissagai pingaaruteqartoq, immikkut ilisimasalik naliliivoq.
- Inuiaat pigineqarsinnaanngitsut oqaraanni, Trumpip Russit Kinamiulluunniit umiarsuaannik Kalaallit Nunaata eqqaaniittoqannginneraanera, taava taanna saassussisariaqalissaaq akeqqersimaarnerulertariaqassallunilu.
- Nalimmassaanerulluni oqartoqarsinnaavoq, umiarsuarnik sorsuutinik taamak amerlatigisunik eqqaaniittoqassagaluarpat, taava Kalaallit Nunaata USA Natolu qanimut suleqatigissavai.
Aammattaaq – Donald Trumpi ilumoorneranngikkaluarlugu – qaninnerusumik suleqatigiinnissamut neriorsuisoqarnerani nersualaarneqarsinnaavoq.
- Oqaatigineqarsinnaavoq, Trumpi aqutsisuunermini sillimaniarnermi politikimut tunngasut pingaarutillit ukkatarissallugit qanoq sapinngitsiginerai takussutissat ilagaat, tamatumalu kingorna iliuuseqarluta. Tassa nersualaarnerullugu piumasaali tunniunnagu.
