Isumaqatiginninniarnerit unittoornerat isumaqatigiinngissutigaat
Peqqinnissaq pillugu Kattuffiit isumaqarput, inunnut immikkut toqqakkanut ukiuni ataatsimi marlunniluunniit atorfinitsitsisarnissaq Naalakkersuisut neqeroorutigigaat. Peqqissaq pillugu Kattuffiit sinnerlugit isumaqatigiinniartoq, Karen Holler, naapertorlugu, sulisorineqalersussat salliutinniarneqarput, ukiorpassuarni sulisuusimasut, Peqqinnissaqarfimmillu napatitsiuarsimasut, tunulliutillugillusooq.
- Taamaattumik ilumuunngilaq sulisitsisut sivikinnerusumik atorfeqartitsisinnaanermut periarfissaq piumasarsuutigalugu atorniaraat, Peqqinnissaq pillugu Kattuffinniit oqaatiginiarneqartutut. Sivikinnerusumik atorfeqartoqarsinnaanera Naalakkersuisut aqqutissiuukkusussinnaavaat. Kikkummi tamat ukiunik pingasunik sivisunerusumilluunniit sivisussusilimmik atorfeqartarneq kissaatigisarinngilaat, Naalakkersuisut isumaqatigiinniartitaasa pisortaat, Palle Ørmark oqarpoq.
- Periarfissaq taanna taamaallaat atorneqarsinnaavoq nalinginnaasumik atugassarititaasut naapertorlugit atorfinitsitsinissaq periarfissaqanngippat, Palle Ørmark nagippoq.
Peqqissaasunut qaammammut 4.000 koruuninik apriilip ulluisa aallaqqaataanniit qaffaanissaq Naalakkersuisut neqeroorutigaat, neriuutigaallu taamatut malunnaateqarluartumik qaffaanikkut peqqissaasunik atorfeqavinniartunik amerlanerusunik soqutiginnilersitsisoqarsinnaasoq, taartaaginnartartunik atorfeqartitsineq ingerlatiinnarunnaarlugu.
Peqqinnissaqarfimmili sulisorisat allat taamatorsuaq qaffaavigineqarnissaat Peqqinnissaq pillugu Kattuffiit ilimagissanngilaat, isumaqatigiinniarnerni Sulinermut Inuussutissarsiuteqartut Kattuffiannut isumaqatigiissuteqartunit allaanerusumik annertussuseqartunik.
Peqqinnissaq pillugu Kattuffimmiit suliumajunnaarnissamik nalunaartqoartinnagu isumaqatigiinniarnerit ajalusoortutut oqaatigisinnaanngilavut. Taakku piareerpata isumaqatigiinniarnerit aallarteqqikkumaarput, Palle Ørmark oqarpoq.
