Isumaqatiginninniarnerit oqaaseqarfigiumanngikkallarpaat
- Ataatsimiinneq nuannersumik ingerlavoq, aamma tamatta paaseqatigiinnissarput isumaqatigiissutigaarput, Nunamut naminermut naalakkersuisoq, Anthon Frederiksen ippassaq oqarpoq. Taassuma aningasaqarnermut naalakkersuisoq, Palle Frederiksen, ilagalugu kommunini sisamani borgmesterit, KANUKOKA-llu siulittaasua, Enok Sandgreen, ataatsimeeqatigaat.
Enok Sandgreenip ataatsimiinneq aamma iluarisimaarpaa.
- Malugisinnaavara suli oqaloqatigeeqqissasugut. Kommuniniit saqqummiussagut Naalakkersuisunut tamakkiisunut saqqummiunneqassapput, taamaalereerpallu uterfigineqaqqissalluta. Silaannaq saligaanneroqaaq, taamaattumillu oqaloqatigiinnerit ingerlaqqinnissaannut neriuuteqarpugut, KANUKOKA-p siulittaasua oqarpoq.
Naalakkersuisut aappaagumut aningaasanut inatsisissami kommuninut ataatsimoortumik tapiissutini 36 millioni koruuninik sipaaruteqarnissaq siunnersuuteqarput.
Borgmesterit KANUKOKA-llu siulersuisuisa siusinnerusukkut erseqqissarpaat, kommuninik iluarsaaqqinnermi aningaasatigut iluanaarutissat imaaliallaannaq takkunnavianngitsut.
- Sulisoqarnikkut nikikkiartorneq ukiuni tulliuttuni aatsaat takuneqarsinalissaaq, taamattumik taanna sipaarfigeqqunngilarput,
Enok Sandgreen oqarpoq.
- Paasissutissat assigiinngitsut, KANUKOKA-miit borgmesteriniillu saqummiunneqartut, eqqartoqqinneqartariaqartut isumaqatigiissutaavoq. Naalakkersuisunut oqqutissavagut, tamatumalu kingorna oqaloqatigiinnerit nagineqassallutik, Anthon Frederiksen oqarpoq.