Isumaqatigiissutit qanoq paasineqarnissaannik isumaqatigiinnginnerit

novembarip 08-at 2004 22:07

Sulisorisat namminneq illutaarpata, angerlarnissaminnut akiuliunneqassanersut politikerit aalajangissagaat, Aningaasaqarnermut Pisortaqarfimmi pisortaq Peter Bech oqarpoq.

Isumaqatigiissutit qanoq paasineqarnissaannik isumaqatiginninniartarfiup paatsuungalersitsinera pillugu, Peter Bech ima nassuiaavoq:

- Isumaqatigiissutit allatut paasisassanngortinneqarsimasutut isumaqanngilanga.

Massakkutut taama paatsuungasoqalerpat apeqqutinngorpoq taava qanoq iliuuseqarfigisinnaanerivut.

Siumut isigisumik eqqarsassagutta, taava apeqqutit taamaattut  isumaqatiginninniarnernut tullernut ilaanissaat pissusissamisuuginnarpoq.

Peter Bech oqarpoq, nangillunilu:
- Naalakkersuisunut allagaqarnissatsinnik eqqarsaateqarpugut, isumaqatigiinniaqqinnissat tungaannut, isumaqatigiissutit qanoq paasineqarnissaannik politikkikkut   aalajangertoqarniassammat.

Isumaqatigiissaaniartartut eqqartuussiviilluunniit matumani aqqutigineqarsinnaasut ilagaat, kisianni isumaqarpunga tamanna kajuminnganngitsoq, taamaattumillu politikkikkut aalajangiiffigineqartariaqarluni.

Qanoq ingerlariaqqinnissaq eqqarsaatigalugu, kommunit aamma oqaloqatiginiarpavut.

Suliap qanoq ingerlaqqinnissaa pillugu, kattuffiit ilisimatinneqassasut Peter Bechip ilanngullugu oqaatigaa.