Dansk Magisterforening aappaagu Namminersornerullutik Oqartussanik akissarsiassat pillugit isumaqatiginninniarnissaminnut piareersarput. Nunatsinni Ilinniagartuut Peqatigiiffiata, AC-p, Namminersornerullutik Oqartussat isumaqatigiissut malillugu isumaqatigiinngissutaasut pingasut eqqartuussivimmut ingerlateqqinneqannginnissaat anguniarlugu immikkut toqqakkanik isumaqatigiinniartitsipput.
Danmarkimi ilinniagartuut peqatigiiffiata quppersagaanni atuarneqarsinnaavoq Kalaallit Nunaanni atorfinitsitsisarnernut tunngasut allaaserineqarsimasut. Ilinniagartuut peqatigiiffiata piumasaraa Qallunaat Nunatsinni atorfinittartut atugassarisaasa ajorseriannginnissaat.
Assersuutigalugu akissarsiat soraarninngornissamullu ileqqaakkat ilinniarnertuut Kalaallit Nunaanni sulisartut Danmarkimi ilinniarnertuut akissarsiaqartarneriniit annikinnerusut oqaatigineqarpoq. Ukiut sisamat Kalaallit nunaanni atorfeqarsimasut Danmarkimi sulisimasunut sanilliukkaani akissarsiatigut assigiinngissutaat 5000 koruuningajaapput.
Inissaqartitsiniartarnerup ajornera aamma eqqaaneqarpoq, ilaatigut allaat Nunatsinni atorfinissimasut inissaminnik aalajangersimasumik pisinnaanerat ukiut arlallit ilaatigut utaqqeqqaarluni aatsaat pisinnaasarmat.