Isumaqatigiissutissat suli inissinneqanngitsut

Naak silaannakkut imaatigullu angallassisarnissamut isumaqatigiissutissat ukioq manna junimili naammassineqartussatut angallanermut naalakkersuisumit naatsorsuutigineqaraluartoq suliaq suli kinguaattoorfiuvoq.

Allattoq Bikki P. Kleist, Sara K. Jakobsen

septembarip 08-at 2016 06:09

Imaatigut silaannakkullu isumaqatigiissut junimi naammassineqartussatut Knud Kristiansenip siorna novembarimi oqaatigigaluarpaa kinguaattoortoqareerporli.

Aamma atuaruk Kiffartuussinissamik isumaqatigiissutit kinguaattoortut

- Tassa pisariaqarsimavoq, soorunalimi uggornarpoq, kisianni suliap pitsaasumik naammassinissaa aamma taanna pisariaqartissimavaat, angallannermut naalakkersuisoq Knud Kristiansen oqarpoq.

Kiffartuussinissamut isumaqatigiissut maanna atuuttoq ukiup naanneranut atuuppoq. Isumaqatigiissutissarli nutaaq suliarineqaleruttorpoq.

- Immaqa naggataajusumik apeqqutit kingulliit aningaasaqarnermut akileraartarnermullu ataatsimiititaliamiipput. Neriuppunga kingulliit suliarineqartut. Taava tassa kiisami naammassigaluttualerunarpoq.

Qaqugu?

- Taakku suliarinnereerpata piffissami qanittumi utertissagaat naatsorsuutigaara. Taamaasilluta naammassisinnaalissagunarparput. Kiisami, Knud Kristiansen oqarpoq.

Aamma atuaruk Kiffartuussinissamik isumaqatigiissuteqarfiusunut billetsit akiisa 2/3-lii pisortat akilertarpaat

Kiffartuussinissamulli isumaqatigiissutissap naammassinissaanut unammillernartoqarsimasoq, Knud Kristiansen nangippoq:

- Malunnarsimavoq isumaqatigiinniarniviit ukiorpassuit pisimanngitsut. Isumaqarpungali atuutilerpata tunngavissarissaassalluta.