Isumaqatigiissutissaq inaarsalerpaat
Naalakkersuisunik nutaanik pilersitsiniarluni isumaqatigiinniarnerit ullumikkut ingerlateqqinneqassapput. Ippassaq paasinarsivoq, Nunatsinni naalakkersuisoqatigiilersussat tassaassasut Inuit Ataqatigiit, Demokraatit aamma Kattusseqatigiit Partiiat.
Allattoq Karsten Sommer
juunip 08-at 2009 07:51
Taakkua Inatsisartuni inissanit 31-usunit, 19-inik ilaasortaatitaqarput.
Maanna naalakkersuinermut tunngasut, Naalakkersuisoqarfiit agguataarneri, kikkullu naalakkersuisoqarfinnut sorlernut akisussaasuussanersut, ullumikkut oqaluuserineqaqqissapput.
Kuupik Kleist qaqugu Naalakkersuisut siulittaasuattut taaneqarsinnaalissavit?
- Naalakkersuinermut tunngatillugu qulakkiivillugu oqaruminaappoq. Soorunalimi inatsisartuni amerlanerussuteqartut taamatut tallimanngorpat inissititernermi taassappannga, taava tassani taamatut oqartoqarsinnaanngussaaq. Aamma maannamut suli Naalakkersuisooqatigiinnerup taaguutissaanik eqqartuisoqanngilaq, Kuupik Kleist taama oqarpoq.
