Mute Bourup Egede: Isumaqatigiissutip Naalagaaffeqatigiinnermut tunngasortai iliuusinngorlik
Naalakkersuisuulersussat Naalagaaffeqatigiinneq pillugu ilaatigut ima allassimapput:
"Kalaallit Nunaat Savalimmiullu peqatigalugit Danmarkip akisussaaffeqarfigisai ineriartortissavagut."
Inuit Ataqatigiit siulittaasuata neriuutigaa oqariartuut taanna piviusunngortinneqassasoq.
- Oqaasertaliunneqartut taakkua kusanartut iliuuseqarnikkut takutitsivigineqartariaqarput, Mute Bourup Egede oqarpoq.
AAMMA ATUARUK Aki-Matilda: Suli qineqqusaartoqannginnerani isumaqatigiinnialereerpugut
AAMMA ATUARUK Socialdemokraatit naalakkersuisunngortitsinissamut isumaqatigiissutaat naammagisimaaraa
Danmarkimi naalakkersuisuulersussat Socialdemokraatit, SF-imik, Enhedslistenimik Radikale Venstremillu ikorfartorneqartussat suleqatigiinnissamik toqqammavissartik pingasunngornermi saqqummiuppaat.
Sulinermi politiit pineqaatissinneqarsimasunilu inissiisarfinni paarsisut naligiimmik akissarsiaqartinneqarnissaat, folketingimut ilaasortap Aki-Matilda Høegh-Damip (S) aamma sulissutiginiagai, aallartiffissat ilaattut taavaa:
- Aallartiffiginiartigu, Danmarkip nunattalu akornanni naligiittut ingerlaniarsimagutta, nunatsinni politiit nunatsinnilu parnaarussivinni nakkutilliisut qallunaat nunaanni sulisut assingannik akissarsiaqalersinneqarnissaat.
Silap pissusiata allanngoriartornera pillugu suliniarnerat pitsaasoq
Danmarkilli akisussaaffeqarfigisaani suna ineriartortitassatut salliunneqassanersoq oqaatiginngilaa, taamaattorli:
- Namminersorneq pillugu inatsimmi isumaqatigiissuteqarsimanerput aallaavigalugu suleqatigiinnerup pitsaasup aammalu nunarput siunissami immineq napatittup pilersinneqarnissaanut imminut pisussaaffilersimanitta massakkut timitalerneqarlunilu, oqaasiinnaanani, ingerlanneqarnissaa suliarineqartariaqartoq oqaatigerusuppara.
- Danmark Naalagaaffeqatigiinnut aamma ilaavoq. Naalakkersuisunngortut Naalagaaffeqatigiinni tatigeqatigiinneq ataqqeqatigiinnerlu tunngavigalugit naligiimmik, pitsaasumik nukittunerusumillu suleqatigiittoqarnissaa kissaatigaat. Kalaallit Nunaat Savalimmiullu peqatigalugit Danmarkip akisussaaffeqarfigisai ineriartortissavagut.
Isumaqatigiissut tamakkerlugu
Danmarkimi naalakkersuisuulersussat inooqataanikkut naligiinnginneq silallu pissusiata allanngoriartornera pillugit suliniarnerat pitsaasutut isigaa:
AAMMA ATUARUK Socialdemokraatit naalakkersuisunngortitsinissamut isumaqatigiissutaat naammagisimaaraa
- Taamaalillunilu nunarsuarmi inuusuttorparujussuit siunissartik pillugu oqariartuutaannik tusarnaarlutik allorialernerat isumaqarpunga neriuummik tunniussisoq. Aammalu tusarnaartariaqaripput isumassarsiorfigalugulu, naalagaaffeqatigiinnerup iluinnaaniunngitsoq, Danmarkip iluinnaaniunngitsoq, kisianni nunarsuaq tamakkerlugu aamma takutitsiviusariaqarpoq, Mute Bourup Egede oqarpoq.
Naalakkersuisut Siulittaasuat danskit isumaqatigiissutaat pillugu oqaaseqartinniaraluarpagut, tamannali iluatsinngilarput.