Isumaqatigiissutip atorunnaarsinissaa nalornissutigaa
Air Icelandimik isumaqatigiissutip sakkortuumik isornartorsiorneqarnerata kinguneranik Palle Christiansen aningaasaqarnermut naalakkersuisutut ippassaq tunuarpoq. Taamaattoq kingoraartaa isumaqatigiissummik atorunnaarsitsinissaminik neriorsuinianngilaq.
- Naagga. Neriorsuutigisinnaanngilara. Suliarli sukumiinerusumik misissorusuppara, susassaqartullu oqaloqatigerusullugit. Taava kingorna qanoq pisoqassanersoq takujumaarparput, neriuutigaaralu aaqqiisoqarumaartoq, aningaasaqarnermut naalakkersuisunngorlaaq Maliina Abelsen oqarpoq.
Akileraarutitigut aaqqissuusseqqittoqarnissaanik Akileraartarnermut atugarissaarnermullu ataatsimiititaliap sapaatip-akunnerata massuma ingerlanerani innersuussutigisaa pingaarnerusoq taassuma aamma erseqqissaatigaa.
Maliina Abelsenip aaqqissuusseqqinnissarpassuit isumagissavai:
- Nukissat pisariaqartitakka pigaakka - ajornavianngilaq. Isumaqarpunga tusarnaarnissaq, attaveqaqatigiinnissaq, maniguunneq minnerunngitsumillu ilinniarneq pingaarnerpaassasut. Kisianni aamma siunissami amerlasuunik ikinnguteqarunnaassagunarama sungiunniartariaqassavara, persarineqarnerusalissagunarlungalu. Ilikkassaqaqqaarparali, Maliina Abelsen oqarpoq.