Isumaqatigiissuteqarluni aqutsineq Sermersuumi atuutilissaaq
Isumaqatigiissuteqarnikkut aqutseriaaseq Kommuneqarfik Sermersuumi aasaru atuutilissaaq. Inuussutissarsiornermut tunngasut siulliullugit isumaqatigiissuteqarnikkut Kommuneqarfik Sermersuumi aqutsiffiulersinnaassapput.
februaarip 24-at 2010 07:22
Aningaasaqarnermut Ataatsimiititaliap inassuteqarnera aallaavigalugu kommunalbestyrelsi aamma aalajangiivoq inuussutissarsiutitigut ineriartortitsineq pillugu isumasioqatigiinnik pilersitsisoqassasoq, taakkulu inuussutissarsiornermut ingerlatsivimmi siulersuisutut inissisimalissapput, Kommuneqarfik Sermersooq tusagassiuutitigut nalunaarummi taama ilisimatitsivoq.
Pilersaarutit pissusissamittut ingerlassappata inuussutissarsiornermut tunngasut juulip ulluisa aallaqqaataanni isumaqatigiissuteqarnikkut aqutsiffiulersinnaassapput.
Kommunimi sullissiviit allat isumaqatigiissuteqarnikkut ingerlatseriaatsimut piaarnerpaamik 2011-mi januaarip ulluisa aallaqqaataanni ikaarsaarsinnaanissaat pissangatinneqarpoq.
