Isumaqatigiissut isornartorsiorneqartoq

Kalaallit Nunaata Savalimmiullu akunnerminni isumaqatigiissutaat ippassaq annertusineqarpoq, naalakkersuisut siulittaasuata Hans Enoksenip Savalimmiunilu nalakkersuisut siulittaasuata Jóannes Eidesgaardip isumaqatigiissut atsioramikku.

Isumaqatigiissulli Inuit Ataqatigiit siulittaasuata tulliannit Asii Chemnitz Narupimit isornartorsiorneqarpoq.

Allaffissornikkut aqutseriaatsit suleriaatsillu inuiaqatigiinnut naleqqussarneqartariaqartut Asii Chemnitz Narupip naalakkersuisut siulittaasuannut Hans Enoksenimut ammasumik allagaqaateqaammini allappaa.

- Allaffissornerup Savalimmiuni minnerpaaffimmiitsinnissaanut tupinnaannartumik iluatsitsisoqarsimasoq ilisimaneqarmat, suleqatigiinnissamut isumaqatigiissusiornermi tamatumuunakkuttaaq isumaqatigiissusiorsimassasusi naatsorsuutigisimagaluarparput, Asii Chemnitz Narup IA sinnerlugu oqarpoq.

Kommunit kattussuunneqarnissaat eqqarsaatigalugu Savalimmiut suleqatigalugit piareersalertoqartariaqartoq aamma oqariartuutigineqarpoq.

- Kommunit kattussuunnissaanut ikaarsaaleraluttuaqaagut, allaffissornikkut naleqqussaanissaq, eqaallisaanissaq sullissinikkullu pitsaassutsimik qaffaanissaq piareersalertariaqarpoq, Savalimmiormiullu suleqatiserinissaat isumassarsiorfigineqarnissaallu piukkunnarsorivarput, IA-p siulittaasuata tullia allappoq.

Savalimmiut Kalaallit Nunaatalu akornanni isumaqatigiissummi inuussutissarsiornermut, ilinniarnermut ilisimatusarnermullu tunngasut suleqatigiissutigineqarnerunissaat atsioqatigiissutigineqarpoq.