Isumaqatigiissut atorunnaarsinneqarpoq
Ruslandimi præsidentip Vladimir Putinip Europami sakkutuulersornissamut isumaqatigiissut CFE-traktat atorunnaarsissimavaa. Isumaqatigiissut malillugu Russit Nunallu Killiit Illlersoqatigiiffiat, NATO, sakkut suut sakkutuullu qassit Europami sumi inissinneqassanersut killilersimaarneqaraluarput. Isumaqatigiissut atorunnaarmat Russit sakkutik sakkutuutillu piumasaminnik inissiortorsinnaalissavaat. Sakkutuut naalagaaraasa ilaat, sillimanissarlu pillugu politikkimik naliliisartoq Carsten Møller Danmarkimi Nunat Tamat Pillugit Ilisimatusarfimmeersup pissutsit nalilerpai.
Isumaqatigiissutip atorunnaarnera sunniuteqarpallaartariaqanngilaq, politikkikkulli russit iliuuseqarnerisa oqariartuutaasullusooq eqqarsaallatsitsisinnaavoq, isumaqatigiissummi malillugu sorsunneq nillertoq qimanneqarsinnaasimavoq sakkut sakkutuullu sumi qassit inissinneqassanersut isumaqatigiissutigineqarmata. Russilli soorlu oqartut qanga pisunit isumaqatigiissut aallaaveqarmat atorunnaarsittariaqalersoq. Taamaakkaluartoq nunat assigiinngitsut tatigeqatigiinnissaannut isumaqatigiissut iluaqutaagaluarpoq. Neriunaraluarporlu isumaqatigiissutip taama sunniuteqarsimatigisup atorunnaarsinnginnerani isumaqatigiissummik ullumikkut pissutsinik aallaavilimmik taarserneqarnissaa, Carsten Møller naliliivoq.
