Isumaqatigiissut assortuussutaaqisoq ajorineqanngitsoq
Tamanna Qaasuitsup Kommuniata isumaqatigiissummut nalileeqqusilluni saaffiginissutaanut Nunami Namminermi Pissutsinut Allaffeqarfiup akissuteqaataani takuneqarsinnaavoq.
Siusinnerusukkut oqaluttuareriikkatsitut Qaasuitsup Kommuniata Kommunit Nakkutilliisoqarfiannut kommuunip Realdania Bygimut World of Greenlandimullu isumaqatigiissuteqarsimanera inatsisinik unioqqutitsinerunersoq naliliiffigeqqunikuuaa.
Taamatullumi isumaqatigiissuteqarsimaneq inatsisinik unioqqutitsinerunngitsoq Nunami Namminermi Pissutsinut Allaffeqarfiup, kommuuninillu ulluinnarni nakkutilliisiisartup akissuteqaatigivaa:
- Suleqatigiinnissamut isumaqatigiissut piareersaataasumik isumaqatigiissutaavoq Ilimanami takornariaqarnerup immikkut piumasaqaateqarluni siuarsarnissaanut. Kommuuni taamatut ittunik isumaqatigiissuteqarsinnaavoq, matumanili suliniutip aallartinnerani inatsisit allat kalluarneqartussat unioqqutinnginnissaat eqqumaffigiinnartussaallugu, taama Nunami Namminermi Pissutsinut Allaffeqarfik Qaasuitsup Kommunianut akissuteqarpoq.
Taamaalilluni Qaasuitsup Kommuniata Ilimanami suliniut, ilaatigut illorsuarmik ataatsimiittarfimmik illuaqqanillu 15-inik pilersitsiviusussaq ingerlassinnaavaa. Taamaattorli tassa kommuunip eqqumaffigiinnartussaassavaa inatsisit atuuttut malillugit suliniummut ingerlatseqataanissani.
Ilimanaq pillugu suliniummi assortuussutaaqisumi, Realdania Byg, World of Greenland aamma Qaasuitsup Kommunia ataatsimoorlutik isumaqatigiissuteqarput tamarmik immikkut suliniummut tapersiissuteqarnissaminnik. Kommuuni talittarfiup pitsanngorsarnissaanut, kuuffilersuinissamut inuinnaallu aqqutaannik pitsanngorsaanissamut suliassaqarpoq. World of Greenland illuaqqanik 15-inik sanaartortitsissaaq. Realdania Bygilu illorsuarnik pisoqqanik marlunnik nutartaassaaq.
Illorsuit marluk Realdania Bygip nutarterniagai tassaapput niuertup illorsua pisiniarfitoqarlu, tamarmik 1700-kkut qiteqqunneraneersut. Illorsuit taakkua ullumikkut eqqissisimatitaapput atorneqaratik aserfallassimallutillu.
