Isumaqatigiissusiortoqarnissaa ministeriunerup uteriiserutigaa
Uuliaqarfiit Indiamiittut tuluit uuliasioqatigiiffiannut Vedanta Ressourcesimut Cairn Energyp qaammatini arlalinni tuniniaraluarpai. Indiamili oqartussat tuniniaanermut akuliupput, aningaasat 50 milliardit koruuningajalluinnaat tassani pineqarlutik.
Cairn Energyp tuluit uuliasioqatigiiffiannut tuniniaanera piviusunngunngitsuussagaluarpat, Cairn Energyp Kalaallit Nunaanni uuliasiornissaminut pilersaarutai akornuserneqarsinnaapput. Aningaasarpassuimmi pineqartut nunatsinni uuliasioqqinnissamut atorneqartussaapput.
Indiamiut uuliasiornissamut akuersinissaminnut arlalinnik piumasaqaateqarsimapput. Indiamiut uuliasioqatigiiffiata naalagaaffimmit pigineqartup, ONGC-ip, Indiami Rajasthanimi uuliaqarfiit 30 procentiinik piginnittup, piumasaraa Cairn Indiami naalagaaffimmut akiliissasoq. Tamannali Cairnip Vedantallu akueriumanngilaat.
Aviisimi Financial Timesimi allassimasut naapertorlugit David Cameronip Cairn sapaatip-akunnerani uani qinnuigisimavaa, Indiamilu ministeriuneq Manmohan Singh allaffigisimallugu. Allakkamini erseqqissarsimavaa, isumaqatigiissut tuluit Indiami sulinerannut qanoq pingaaruteqartigisoq, akuersissummillu pinissaq sukkanerpaamik pisariaqartoq.
Tunisinissamut killissaritaasoq tassaavoq apriilip ulluisa 15-iat. Ulloq taanna atsioqatigiittoqanngippat, Cairn piginneqataasunut akuersissummik kingumut qinnuteqartariaqassaaq.
