Isumaqatigiissusiortoqarnissaa ilisimatuut ilungersortumik kaammattuutigaat
- Silap pissusaa pillugu isumaqatigiinniuteqartussanut nunanit 192-ineersunut ilisimatuutut tamanna saaffiginnissutaavoq kingullerpaaq, Tysklandimit naalakkersuisut silap pissusaa pillugu siunnersuisoqatigiivini siulittaasoq, Hans Joachim Schellnhuber, oqarpoq.
Nunarsuarmi silap kissatsikkiartornera aammalu kingunerisassai imaannaanngitsut siuttut uppernarsisariaqaraat, erseqqissaatigaa, aviisimi ullormut saqqummersartumi, Dagbladet Informationimi, tamanna allaaserineqarpoq.
Ilisimatuut kajumissaarutaat paatsuugassaanngilaq. Maannakkut iliuuseqartoqanngippat nunarsuarmi sila ukioq 2100-mi 7 gradit tikillugit kissassuseqalissangatinneqarpoq.
- Nunarsuarmi CO2-mik aniatitsinerit ukiuni tulliuttuni qaninnerpaani tallimani-qulini pilertortumik annikillisinneqartariaqarput, nunarsuatsinni silap allanngoriartornerata kingunerinit ajornerpaanik atugaqassanngippat, nalunaarusiami The Copenhagen Diagnosisimi eqikkaaneq taama nipeqarpoq.
Nunarsuup silaannartaata CO2-mik akua ukiut 800.000-it ingerlaneranni qularnaatsumik ullumikkut annertunerusoq, ukiunilu kingullerni 3-20 millionini suli annertunerulersimasoq, nalunaarusiami erseqqissarneqarpoq.
